bwiza.com
Ahabanza » Kigali: Ibigo bitwara abagenzi ‘Binengwa kenshi’ byongerewe amezi arindwi
Amakuru mu Rwanda

Kigali: Ibigo bitwara abagenzi ‘Binengwa kenshi’ byongerewe amezi arindwi

Ni kenshi uzasanga abagenzi bari ku mirongo hirya no hino muri gare zo mu mujyi wa Kigali no ku byapa, bategereje imodoka, bamwe usanga bijujutira serivisi bahabwa ko zituma bakererwa ku kazi, abataha bakagera mu rugo bwije kandi nta ruhare babigizemo, abanyeshuri bagakererwa kugera ku mashuri,…

Usanga Ikigo cy’Igihugu gishinzwe kugenzura imirimo imwe n’imwe ifitiye igihugu akamaro (RURA) hamwe n’Umujyi wa Kigali, bibazwa kenshi kuri iki kibazo ndetse binasabwa kuba byakwaka isoko ibi bigo birimo R.F.T.C, Royal na KBS, bitwara abagenzi, ko bitanga serivisi mbi.

Ni ikibazo cyaje no kwisuzumirwa n’uwahoze ari umuyobozi w’Umujyi wa Kigali, Pascal Nyamurinda, icyo gihe wavuze ko yamaze amasaha atatu ahagaze ku murongo muri Gare, arimo gusuzuma niba ibivugwa ari ukuri. Atungurwa no kuyamara nta modoka yari yahagera ngo itware abagenzi kandi ari nijoro.

Yagize ati “Ibyo bibazo nanjye narabyiboneye rwose, ejobundi navuye Down Town [gare yo mu mujyi] saa tatu z’ijoro. Abaturage barategereza cyane amasaha arenze atatu, ibyo ni ukuri”.

Mu gihe benshi basabaga ko habaho impinduka ibi bigo bikikosora, Umujyi wa Kigali utangaza ko byongerewe igihe cy’amezi arindwi, yiyongera ku gihe amasezerano byari bifite yagombaga kumara.

Nk’uko bitangazwa n’umuyobozi Mukuru Ushinzwe Imiturire n’ibikorwaremezo mu mujyi wa Kigali, Rwunguko Jean d’Amour, avuga ko hari inyigo irimo gukorwa izashyirwa mu isoko rizaba ripiganirwa.

Yagize ati “Ayo mezi araterwa n’uko inyigo twatangiye gukora itugaragariza ibintu bitandukanye tugomba gushyira mu isoko, isoko ry’abashya noneho bazaba batwara abagenzi iyo ngiyo ntabwo yari yarangira, harimo gusa amakuru azadufasha gutanga amasoko”.

Nk’uko RBA ibitangaza, uyu muyobozi akomeza avuga ko gutanga isoko bizatangira mu kwezi gutaha, ngo bikorwe na RURA.

Mu gihe rimwe na rimwe bisobanurwa ko uku gutinda ku mirongo byaba biterwa n’imihanda itameze neza, mu mihigo y’ubuyobozi bushya bw’umujyi wa Kigali, buvuga ko ikorwa ry’umuhanda mu myaka ine, hazakorwa imihanda ya kaburimo ingana na 180km.

Muri Nzeri 2013, nibwo Umujyi wa Kigali watangije gahunda nshya yo gutwara abagenzi mu mujyi wa Kigali, aha uwari umuyobozi w’umujyi wa Kigali, Fidele Ndayisaba yari yavuze ko nta mugenzi uzajya amara iminota itanu ku cyapa ategereje imodoka cyangwa ngo nayo iyihamare imutegereje.

Hashize amezi atatu nibwo Meya Ndayisaba yisubiyeho, avuga ko iminota 5 bitagishobotse, atanga igihe cy’umwaka ko ari bwo iyi minota yajya yubahirizwa.
Aha yagize ati “Mu igenzura tumaze gukora muri aya mezi atatu twasanze imodoka imara hagati y’iminota umunani na makumyabiri kugira ngo ibe ivuye ku cyapa ariko twifuza ko nyuma y’umwaka imodoka zose zaba zubahiriza iki gihe cyashyizweho”.

Ibi Ndayisaba yabivugaga mu Ukuboza 2013, umwaka yatangaga wari uwa 2014, ko bizaba byakemutse umugenzi akaba yamara igihe kitarenze iminora 5, none aho kuba itanu ahubwo yarushijeho kwikuba, n’amasaha 3 ashobora gushira.

Muri iyi nama kandi nibwo abanyamakuru babajije Meya Ndayisaba niba mu gutegura uyu mushinga baratekereje ku ibungwabungwa ry’ibidukikije cyangwa se ibikorwaremezo, ari nabwo bamubajije niba ku byapa hazashyirwa ubwiherero.

Yasubije avuga ko mu minota itanu umuntu ashobora kuhamara, yakabaye yavuye mu rugo yakemuye utubazo duto duto (kwihagarika,…) atari ngombwa kuzihashyira, ariko ubu usanga bahamara isaha 2, bamwe bakikinga ku biti n’ibindi bibakingiriza. [bikomeje gutya nk’umwanditsi ndabona ubwiherero bwaba bukenewe].

 

Izindi wakunda

Bwiza.com