bwiza.com
Amakuru Politiki

Nyamasheke: Basabwe kutakira abana bo kurera babategerejeho indonke

?

Ubuyobozi bw’akarere ka Nyamasheke buvuga ko,kubera impamvu nyinshi zitera abana kwisanga nta babyeyi cyangwa n’abo bafite babafashe nabi cyane ku buryo bisaba ko umwana agira umuryango umwitaho arererwamo, hari abana bisaba  ko bagira ababyeyi b’impuhwe bitwa ba Malayika murinzi babafata bakajya kubarera nk’ababo ngo babashe kubaho neza,hakaba ariko na bamwe muri aba babyeyi bashobora kwibwira ko hari indonke bazabiboneramo,abameze nk’aba bakaba bamaganwa.

Mu biganiro by’iminsi 3,ba Malayika murinzi bagera kuri 38 bahugurirwa kuzakira abana nk’aba igihe baba babahawe, byagaragaye ko hari bamwe mu bumva gufata abana nk’aba bakumva nibabahabwa hari ibindi bazabakurikizaho bazahabwa na Leta cyangwa abafatanyabikorwa bayo bibarera,hakaba n’abashaka kubafata bacunze imitungo aba bana basigiwe n’ababyeyi badashobora gucunga, cyangwa izindi ndonke, ari yo mpamvu ngo hari abaza bigize ab’impuhwe ngo na bo bazahabwe abana,bamara kumva ko nta kintu bazahabwa bakigendera,bagenzi babo bakaba babagaya.

Mukayiranga Spéciose utuye mu kagari ka Karusimbi,mu murenge wa Busehenge asanga nta mpamvu yo kurera umwana umutegerejeho indamu,kuko ingorane aba yarahuye na zo n’uwawe yazigira kandi utakwifuza ko yarerwa n’umubyeyi gito uba ameze nk’umucuruza.

Avuga ko abana nk’aba muri aka karere bahari,bigaterwa n’impamvu nyinshi zirimo gupfa kw’abayeyi bombi bakabura kirera, ababyarwa n’abana b’abakobwa bakabajugunya bigasaba imiryango y’impuhwe ibafata ngo ibarere, abana bafite ubumuga babonwa nk’umutwaro ku bababyaye bagafatwa mu buryo butabereye ikiremwamuntu,n’izindi mpamvu nyinshi ,biba bisaba ababyeyi b’impuhwe babitaho,n’ibindi.

Ati’’ abana nk’aba barahari kandi baba babayeho nabi cyane ni yo mpamva baba bakeneye ababyeyi b’impuhwe bo kubahumuriza bagasubizwa icyanga cy’ubuzima. Twe twarabyiyemeje turiteguye,umwana wese twabona n’ubwo yaba afite ubumuga butuma ababyeyi be bumva batamwihanganira twe twabihuguriwe twiteguye kubakira tukabarera nta ndamu zindi dutegereje.’’

Yarakomeje ati’’ ababyeyi nk’abo gito bumva kurera abana nk’abo bagatekereza indamu bazakuramo kuruta icyo bazabamarira  bo barahari rwose kuko n’ibiganiro nk’ibi hari ababitangira bakagenda bitahira uko bumva ko nta nka bazahabwa cyangwa amata ya buri munsi yo kubafasha kubarera,ariko ni abo kugawa  kuko umwana nk’uwo wagize ibibazo bimushyira mu mibereho mibi si uwo gushaka kungukiraho.

Birinda Sylvère,umukozi wumuryango mpuzamahanga wita ku bana Hope and Homes for Children wahuguye aba babyeyi,avuga ko gahunda ya ba Malayika murinzi yatekerejwe n’ubuyobozi bw’igihugu nyuma yo kubona imibereho mibi y’abana nk’aba kandi bagenda biyongera,nyamara hari n’uburyo bakwitabwaho mu miryango y’impuhwe ifite n’ubushobozi bwo kubitaho,nubwo n’aba baza bashaka indonke batabura.

Ati’’ubundi Malayika murinzi ni umubyeyi w’impahwe wiyemeza kwakira umwana badafitanye isano akamurera nk’uwe. Hari na  ba Malayika murinzi badasanzwe,abo ni abiyemeza gufata abana nk’abo ariko bafite ubumuga kuko bo n’ubusanzwe imirerere yabo iba igoye,haramutse hagize umwana watereranywe n’umuryango we cyangwa ufite ibindi bibazo bituma atabaho neza  ashobora gushakirwa Malayika murinzi umwitaho uburenganzira bwe bukubahirizwa,uwafata umwana amugamijeho indonke rero nta mutima w’urukundo aba afite nta nubwo twamumuha.’’

Muri ibi biganiro birimo n’impanuro bahawe n’umuyobozi w’aka karere Kamari Aimé Fabien, yabasabye kuba ba Malayika murinzi koko, igihe bazahabwa abana bakazabarera neza nk’ababo bwite nta ndamu zindi babategerejeho, bakaba banagomba gufasha akarere gushaka abandi babyeyi b’impuhwe bakwakira abana nk’abo igihe baboneka kuko impamvu zituma babaho na zo zihoraho.

Kugeza ubu muri aka karere hamaze guhugurwa ba Malayika murinzi  58,abenshi baba barimo abigeze kurera abandi bana batari ababo nubwo baba bari bafitanye indi sano,bakabamo ba Malayika murinzi b’igihe gito bafata abana nk’aba igihe hagishakishwa  abo mu miryango yabo baboneka bakabatwara,hakaba ab’igihe kirekire bafata abana badafite n’umwe wo mu muryango wo kubitaho ba Malayika murinzi bakabarera nk’ababo,hakaba na ba Malayika murinzi badasanzwe bafata bakanita ku bana nk’aba bafite ubumuga.

Ba Malayika murinzi nyuma yo guhugurirwa kurera abana bazahabwa

Izindi wakunda

Bwiza.com