bwiza.com
Uncategorized

Barinubira akajagari k’amagaraje akomeje guteza ubujura n’umwanda mu mujyi wa Rusizi

?

Abaturage bakomeje kwinubira akajagari k’amagaraje agaragara mu mujyi wa Rusizi akawutezamo umwanda, hakabamo na bamwe mu bayitwaza bakiba ba nyiri ibinyabiziga baza kubakoreshaho kandi ari abatekamutwe.

Ubwo Bwiza.com yaganiraga n’abaturage banyuranye kuri aka kajagari bavuga ko kamaze imyaka myinshi abayobozi basa n’abakarebera, bavuze ko iyo ugeze mu yindi mijyi yunganira umujyi wa Kigali uhasanga isuku igaragarira amaso, nyamara uwa Rusizi wo ugasanga ngo ukigaragaramo umwanda abenshi bibaza ikizawuca,bamwe bakavuga ko n’ibi bisigazwa by’amagaraje akorera mu mihanda rwagati biri mu biwutera.

Umwe mu bayobozi mu tugari tuwugize yabwiye Bwiza.com ati’’  akavuyo gaterwa n’aya magaraje adasobanutse rwose karakabije cyane muri uyu mujyi nubwo hashyirwa imbaraga mu kugahashya ariko usanga bikiri ikibazo cyateza n’ibindi byinshi abantu batitaho. Reba nk’iyi mihanda ya kaburimbo twari tubonye  umwanda uyiriho bitewe n’amamodoka na za moto baba bahakorera, ibividanje n’ibindi bihameneka ntibihanagurwe,bimwe mu byuma bajugunya mu marigole y’imihanda bigateza umwanda n’ibindi bibazo biteza.’’

Yarakomeje ati’’ hari n’igihe ubirukana hamwe ukabasanga ahandi,hari n’abajya mu bikari by’abantu ugasanga mu mbuga nto y’umuturage huzuye amagare na za moto ngo ni igaraje, abana bakararana n’ibyuma by’ibinyabiziga mu cyumba mu nzu nto ntibahumeke neza, kikaba ari ikibazo kigaragarira buri wese, ubuyobozi n’abagenda iyi mihanda babona.’’

Usibye uyu mwanda ngo igikomeye ni abajura babyihishamo bakiba ba nyiribinyabiziga bababeshya ngo barabikora,kuko nta n’aho uba wabariza bigasaba kubacungira hafi,utwaye nk’ipine ya moto umumotari agaheba.

Umwe mu bamotari   ati’’ turembejwe n’abiyita abakanishi  muri uyu mujyi kandi ari abajura. Bakwereka ko bagiye kugukorera ikinyabiziga kandi ari ukugira ngo bakwibe bimwe mu byuma byacyo. Nk’ubu umwe anyibye shambrayeri( chambre à air) mbuze uko mbigenza ndamureka kandi  barakorera ahagaragara tukagira ngo baremewe. Bagiye mu magaraje yemewe n’ikinyabiziga cyawe cyagira ikibazo ukabona aho ubariza. Kuki ibi byose biba ubuyobozi burebera nk’ubudahari?’’

Umwe mu bafite amagaraje yemewe muri uyu mujyi unabimazemo igihe,Fanta Djuma, avuga ko  akajagari nk’aka katabahombya bo nk’abafite amagaraje yemewe gusa,gahombya na Leta cyane kuko bica ibiciro bisanzwe by’abakora basora  bo badasora, bakiba abaturage kandi ku igaraje yemewe haba hari uburyo ikinyabiziga cy’umukiliya kirindwa,cyagira ikibazo kikaba cyanarihwa, hakanigishirizwa urubyiruko rwinshi, hakaba hanitaruye umujyi rwagati ku buryo habaye n’inkongi y’umuriro ihaturutse itakwangiza byinshi,ariko nk’igaraje iri munzu ibamo n’umuryango byo ngo bifite ingaruka ndende.

Ati’’ turabangamiwe cyane kandi nta gihe tutagarazaga izi mpungenge ariko ubuyobozi busa n’ubutabibona.Ikitubangamiye cyane kuruta ibindi  ni uko abo bamamyi baca make bakatwikicira akazi, ntibasora kuko baba badashaka kwigaragaza.Harimo akajagari kenshi cyane gafite n’ingaruka ndende batabona kuko hari n’abibwa bakaza gushakishiriza iwacu bababeshye ko badukorera,Leta yonyine ikaba ari yo yagikemura.’’

Avuga ko nk’aho baca amafaranga 2000 abo bamamyi baca nk’amafaranga 800 bigatuma bamwe babayoboka ariko ibyo bahibirwa bikaba byinshi akanavuga ko ubuyobozi bw’umurenge n’akarere ntacyo bubikoraho kandi bubibona byaranasakuje igihe kirekire babyima amatwi cyangwa bakabikemura bya nyirarureshwa,agasaba ko byakemurwa birambye.

Undi muturage na we ati’’ imbere y’iwanjye bahahinduye umwanda gusa,umuhanda bawuhinduye  kaburimbo kandi ntayihari kubera kwirirwa bahakorera kandi nta garaje ihari,hakirirwa n’insoresore z’abajura nijoro zikatwiba kuko uba utazi uhirirwa nk’umukozi cyangwa uza aje gucunga abo aza kwiba nijoro. Amagaraje yo mu mihanda nibayace rwose.’’

Umuyobozi w’aka karere Kayumba Ephrem,na we avuga ko iki ari ikibazo gikomeye koko kandi bakibona,ariko byatangiye umujyi utaragira igishushanyo mbonera,ikibazo kikaba cyumvikana ariko kizagenda gikemuka uko bazagenda bagena aho buri gikorwa kigomba gukorerwa, nibitangira  gukorwa aba na bo bakazerekwa aho bakorera ubirenzeho agahanwa bigaragara ,kuko ngo badashobora guhita babakura muri ibyo bikari barimo nta handi baberekeza,icyakora abateza umwanda mu mihanda ya kaburimbo yari itangiye kuboneka n’abajura bo ngo ntibakwihanganirwa.

Bisaba ko ukoresha ikinyabiziga ahahagarara ngo batamucucura

Izindi wakunda

Bwiza.com