bwiza.com
Amakuru Ubukungu

Gisakura: Ubuke bw’abasoromyi b’icyayi buracyari imbogamizi ku musaruro wacyo

Ubuyobozi bw’akarere ka Nyamasheke n’ubw’uruganda rw’icyayi rwa Gisakura buvuga ko  ubuke bw’abasoromyi b’icyayi cyaho kubera n’aho giteye ugereranije n’aho batuye bukiri imbogamizi ku musaruro wacyo, hakaba hakorwa ibishoboka byose ngo iki kibazo gikemuke,gukemuka kwacyo bikazagira ingaruka nziza ku bwinshi n’ubwiza bw’icyayi   rutunganya.

Ni bimwe mu byagaragajwe n’abahinzi b’icyayi n’abasoromyi bacyo binagarukwaho cyane n’aba bayobozi ku munsi mukuru w’umuhinzi w’icyayi,aho barebeye hamwe aho bageze bagera ku ntego zabo zo kubona icyayi cyiza kandi cyinshi,baboneraho no guhemba abahinzi,abasoromyi n’abandi bakozi b’indashyikirwa mu rwego rwo guteza imbere umuco wo kurushanwa kunoza imikorere byagaragaye ko uri mu byongerera imbaraga abasanzwe bakunda bakananoza umurimo wabo.

Baganira na Bwiza.com,bamwe mu bahinzi n’abasoromyi,nyuma yo gushykirizwa ibihembo, bavuze ko bishimira akazi kabo ariko kakirimo imbogamizi cyane cyane mu misoromere y’icyayi, kuko nk’icy’urunganda n’icyinshi mu cya COOPTHE Mwaga-Gisakura  giteye hafi ya pariki y’igihugu ya Nyungwe kure y’abahinzi, n’amafaranga aba basoromyi bahabwa ngo akiri make, bigatuma baba bake cyane, icyayi kimwe kigasigara mu mirima bigatubya umusaruro.

Dusabimana Chantal,umwe mu basoromyi yagize ati’’ turacyavunika cyane kubera aho duturuka tuje gusoroma nta n’aho tugira tuba,amafaranga duhabwa ku kilo cy’icyayi kibisi twasoromye na yo akaba ari make ugereranije n’imvune duhura na zo n’amasaha menshi dtakaza mu nzira tuza mu kazi tunataha,ari yo mpamvu abasoromyi babura bikagira ingaruka ku musaruro.’’

Yarakomeje ati’’ nk’ubu abasoromyi benshi duturuka Nyamagabe tukaza tugakodesha amazu  tubamo kure y’akazi. Nzinduka saa kumi n’imwe z’igitondo nkahagera saa moya n’igice ngatangira gukora ngasoroma ibilo bigera kuri 80 ku munsi.

Ndi hafi y’akazi n’ibilo 100 nabirenza kandi nkarushaho gusoroma neza ntikanga gutaha ijoro. Tuba dufite abana tutasize twizeye ko bariho uko tubishaka ari yo mpamvu hari igihe umwana yafatwa n’imirire mibi umubyeyi atabishaka kubera kutaba hafi ,n’amafaranga make cyane dusoromera kuko baduha  amafaranga 45 ku kilo, atugeraho akaba 39 andi ntibatubwiye aho ajya. Ibi byose bikemutse nta cyayi cyakongera gusigara mu mirima cyasoromwa cyose kandi neza.’’

Nyirahabineza Vérène  umaze imyaka irenga 30 agihinga,akaba yaranongereye ubuso aho ageze kuri  Hegitari 2,5 yaragihingaga hato cyane,akaba yahawe inka y’ubudashyikirwa mu kucyitaho,avuga ko cyamugiriye akamaro cyane kuko afite yubatse, akagira abana 2 biga kaminuza n’abandi 2 biga ayisumbuye bose barihirwa n’ayo ahakura,aho a ashobora kwinjiza amafaranga hafi 300.000 buri kwezi yahembye abakozi  20 akoresha,yavanyemo n’ibindi byose byangombwa, akavuga ko kuri izi ngorane hiyongeraho n’ihindaguruka rya hato na hato ry’igiciro cy’icyayi, byose ngo bikwiye ingamba zihamye.

Umuyobozi w’uru ruganda Yves Mungwakuzwe, na we yemeza ko  ubuke bw’abasoromyi bubangamiye umusaruro ariko hari ingamba zo kubikemura.

Ati’’ni byo koko ubuke bw’abasoromyi  buracyari ikibazo kitugoye,butuma hari icyayi cyinshi kigisigara mu mirima cyangwa  ntigisoromwe mu buryo twifuza bigatubya umusaruro,bikaba imbogamizi ku bwiza n’ubwinshi bwacyo,cyagera ku isoko ugasanga wakoresheje ibirenze ibyo ukuramo,tukaba twarahagurukiye kugikemura dusubiza ibyifuzo byabo birimo  kubabonera amacumbi bakora batahamo ku buntu, kubaka amarerero y’abana babo,kubaha ifunguro ry’amanywa n’ibindi bakenera,tubona bizabikemura kandi bigiye kugerwaho byose vuba cyane.’’

Avuga ko iyi gahunda yo guhemba indashyikirwa  zirimo n’aba basoromyi na yo iri mu bizamura uyu musaruro mu bwinshi no mu bwiza, agasaba buri wese urebwa n’ubuhinzi bw’icyayi gukorana umwete kugira ngo kirusheho gukomeza kugira ingufu ku isoko mpuzamahanga  bizanatuma na bo icyo bahakura cyiyongera.

Umuyobozi w’aka karere wungirije ushinzwe iterambere ry’ubukungu,Ntaganira Josué Michel, yishimira ko muri rusange icyayi kigira uruhare rukomeye mu bukungu bw’abaturage muri aka karere, ibice bikikije pariki y’igihugu ya Nyungwe kikaba kihera cyane byaranatangiye kubyazwa uyu musaruro,agashima ubuyobozi bw’inganda zigitunganya imbaraga bubishyiramo kugira ngo icyayi cy’aka karere kize ku isonga mu bwinshi no mu bwiza.

Bavuga ko kubura kw’abasoromyi bituma umusaruro w’icyayi uba muke
Nyirahabineza Vérène ahabwa inka nk’umuhinzikazi w’icyayi w’indashyikirwa

Izindi wakunda

Bwiza.com