bwiza.com
Amakuru

Ibitero ku banyamahanga: Nigeria na Zambia batangiye kwihimura kuri Afurika y’Epfo

Mu gihe Abanya-Afurika y’Epfo bagaba ibitero ku banyamahanga baba mu gihugu cyabo, Abanya-Nigeria na Zambia batangiye kwihorera.

Abanya-Afurika y’Epfo batangije ibikorwa by’urugomo byibasira ibikorwa by’abanyamahanga harimo ubucuruzi, ndetse abandi bagahohoterwa, babakubitwaa, bakanangiririzwa umutungo urimo amazu n’imodoka.

Abo muri Nigeria na Zambia bari barahiriye kwihorera bituma amwe  mu maduka muri ibi bihugu afunga. Muri ibi bihugu kandi bavuze ko baragaba ibitero ku nganda na kompanyi zishingiye muri Afurika y’Epfo, bituma MTN, amateleviziyo ya Multichoice na n’amasoko ya Shoprite bifunga imiryango.

” Tugomba guhorera abacu biciwe muri Afurika y’Epfo” Uyu ni Joseph Tasha wari mu magana y’abigaragambirije imbere y’ishami rya Sophrite muri Nigeria.

Iyi myigarambyo yabereye imbere y’iri soko rya Sophrite yaranzwe no gutwikira amapine mu muhanda, byatumye leta yohereza abapolisi ngo babahagarike.

Ku mupaka wa Kazungula uhuza Zambia na Batswana, abaturage basubije inyuma abatwara amakamyo b’Abanya-Afurika y’Epfo. Bagabye ibitero kandi ku bucuruzi bukorwa n’Abanya-Afurika y’Epfo mu gihugu cyabo.

Ibi bibazo by’umutekano muke kandi byatumye Ishyirahamwe ry’Umupira w’amaguru muri Zambia risubika umukino wa gicuti ikipe y’igihugu yari kuzakina n’Afurika y’Epfo tariki ya 7 Nzeri.

Hari amakuru avuga ko bimwe mu bihugu byikuye mu mubare w’ibihugu byari kwitabira inama y’ubukungu (World Economic Forum) yatangiye kuri uyu wa 4 Nzeri muri Afurika y’Epfo, mu rwego rwo kwamagana ibi bikorwa by’urugomo.

Perezida w’Afurika y’Epfo, Cyril Ramaphosa avuga ko iki gihugu ari urugo rwa buri wese. Perezida wa Nigeria, Muhamadu Buhari we yahamagaye uhagarariye igihugu cye muri Afurika y’Epfo ngo asobanure ikibazo uko giteye. Moussa Faki Mahamat uhagarariye Komisiyo y’Umuryango w’Afurika Yunze Ubumwe we yamaganye ibi bitero, asaba ko hafatwa ingamba zikemura iki kibazo mu buryo bwihuse.

Abahanzi babivugaho iki?

Umuhanzi wo muri Nigeria ,Tiwa Savage afashe umwanzuro wo kutazakora igitaramo cya DSTV yari kuzakorera mu mugi wa Johannesburg ku wa 21 Nzeri.

” Ntabwo nshaka kureba abantu bange babagirwa muri Afurika y’Epfo. Iki ni ikibazo kandi ku bw’ibyo ntabwo nzitabira igitaramo gikomeye cya DSTV kizabera muri Johannesburg. Ubu nerekeje amasengesho ku nzirakarengane n’imiryango yagizweho ingaruka n’uru rugomo.” Tiwa Savage.

Wizkid we agira at: ” Nimwiyigishe ubwanyu, mwigishe urubyiruko n’abana. Mbere ya byose turi abantu  kandi icy’ingenzi cyane turi Abanyafurika.”

Burna Boy we yavuze ko nihatagira igikorwa ngo uru rugomo rucike, atazigera asubira muri Afurika y’Epfo.

Amakuru avuga ko abantu batanu ari bo bamaze gupfira muri uru rugomo muri Afurika y’Epfo. Ni imibare yiyongera ku bapfiriye mu rwabaye mu 2008, abantu basaga 60 bapfiramo. Na none mu 2015, i Johannesburg na Durban haguye abantu 7. Muri Werurwe 2019, abantu 3 barapfuye ubwo hagabwaga igitero ku mazu acuruza ibiribwa y’abanyamahanga.

 

 

Izindi wakunda

Bwiza.com