bwiza.com
Amakuru Mu mashuli

Ababyeyi bafite abana biga i Goma ntibakozwa ibyo kubashyira mu mashuri yo mu Rwanda

Abanyeshuri amagana bo mu mashuri y’incuke kugeza muri kaminuza bambuka umupaka buri munsi bava ku Gisenyi mu Rwanda bajya kwiga hakurya i Goma ubu ntibabyemerewe kuva umwaka w’amashuri mushya muri DR Congo watangira ku wa mbere Tariki 2 Nzeri 2019.

Impamvu aba banyeshuri babuza kujya muri Congo, ni ubwoba bw’ikwirakwira ry’indwara ya Ebola iheruka kuboneka mu mujyi wa Goma mu minsi irenga 30 ishize.

Ababyeyi bavuga ko bidashoboka ko abana babo biga mu Rwanda mu gihe bavuga ko imyigishirize itandukanye kandi n’amafaranga y’ishuri akaba atari amawe.

Ababyeyi bavuga ko bohereza abana babo kwiga i Goma kuko amashuri mu Rwanda ahenda, ko abana babo biga mu Gifaransa kandi hari amashami biga atari mu Rwanda.

Umwe mu babyeyi yabwiye BBC dukesha iyi nkuru, ati: “Nk’abana biga ikiganga [ubuvuzi], mu Rwanda nta kiganga gihari mu mashuri yisumbuye, kiri muri kaminuza kandi naho kirahenze. Niba umwana yari ageze mu wa kane w’ayisumbuye yiga ikiganga arajya mu rihe shami rindi kandi amenyereye ikiganga?”

Uyu mubyeyi avuga ko abayobozi  babijeje kubashakira ibigo abana babo bakwigiramo ariko avuga ko bidashoboka ko babona ibigo muri aka kanya.

Undi agita ati: “Nibatureke tujyane abana ahangana n’ubushobozi bwacu, niba muri Congo njyanayo umwana ku mwaka wose nkishyura $80, mu Rwanda ikigo gihari cya macyeya ari 70,000 buri gihembwe! Urumva nzabigenza nte?

Undi mubyeyi umwe yagize ati: “None se twakora iki ko turi munsi y’itegeko, abana turabicaza mu rugo nta handi dufite twabajyana”.

Bige Icyongereza, bige mu Rwanda’

Nyuma y’inama bagiranye n’ababyeyi bafite abana biga muri DR Congo, Uwampayizina Marie Grâce wari umuyobozi w’akarere ka Rubavu wungirije ushinzwe imibereho y’abaturage yabwiye abanyamakuru ko Leta itagomba gushyira abana mu kaga bubohereza ahari Ebola.

Uyu muyobozi  weguye ku mirimo ye ku wa gatatu w’iki cyumweru- icyo gihe yagize ati: “Ikigomba kurebwa mbere ni ubuzima bw’abana. Twashyizeho komite y’ababyeyi yo kureba uko twafasha aba bana.”

Yavuze ko mu Rwanda hari amashuri aba banyeshuri bakwigamo nubwo ari ayo mu Cyongereza  aho kujya i Goma.

Madamu Uwampayizina yagize ati: “Muri aya mezi asigaye [kugeza mu kwa mbere] abo bana baba bategurirwa kuzatangira umwaka utaha bazaba baramenye Icyongereza kibemerera kwiga mu Rwanda.”

Nyuma y’inama ba Minisitiri b’ubuzima b’u Rwanda na Congo bemeje ubufatanye mu kurwanya Ebola ariko hatabangamiwe urujya n’uruza rw’ubucuruzi n’imibereho y’abantu ku mipaka. Gusa Minisiteri y’uburezi mu Rwanda ikaba ntacyo yari yatangaza igiye gufasha aba banyeshuri.

 

Izindi wakunda

Bwiza.com