bwiza.com
Amakuru Politiki

Kinshasa: Abantu 25 bamaze gutabwa muri yombi bagambiriye kwihorera ku banya-Afurika y’Epfo

Polisi ya Repubulika Iharanira Demokarasi ya Congo (PNC) itangaza ko imaze guta muri yombi abaturage ba Congo bagera kuri 25 bashinjwa gushaka guhungabanya ibikorwa by’abanya- Afurika y’Epfo.

Polisi itangaza ko abaturage bashaka guhungabanya ibikorwa by’abanya Afurika y’Epfo nko kwihorera, nyuma yo kumva amakuru y’ibibera muri iki gihugu aho abanyamahanga bahohoterwa.

Ikinyamakuru Actualitecd gitangaza ko abamaze gutabwa muri yombi bafungiye kuri komisariya ya Polisi mu mujyi wa Kinshasa.

Bamwe batawe muri yombi bagiye guteza imvururu kuri Ambasade ya Afurika y’Epfo i Kinshasa abandi bagamije guteza imvururu mu iguriro rya Vodacom ry’abanya Afurika y’Epfo.

Mu ntangiriro z’iki cyumweru nibwo hatangiye gukwirakwira inkuru z’abanyamahanga barimo guhohoterwa muri Afurika y’Epfo, abaturage b’iki gihugu babashinja kubatwara akazi. Leta ya Afurika y’Epfo ikaba yaragaye ibi bikorwa by’urugomo ndetse inasaba inzego z’umutekano kutihanganira uwo ari we wese ufatirwa muri ibyo bikorwa.

Izindi wakunda

Bwiza.com