bwiza.com
Amakuru Politiki

Bamukase umuhogo nk’inyamaswa- Umurundikazi ubara inkuru y’uko umugabo we yishwe

Ciza Venantie, ni umupfakazi w’imyaka 41 y’amavuko utuye muri zone Rusubije, Komini Ntega, ari mu gahinda nyuma y’iyicwa ry’umugabo we, Révérien Kamarampaka, ashinja abayoboke babiri b’ishyaka CNDD FDD, riri ku butegetsi mu Burundi.

Ubuyobozi muri aka gace atuyemo buvuga ko umugabo we yapfuye yiyahuye,  bagashimangira ko uyu mubyeyi afite ikibazo cyo mu mutwe yatewe n’ibyamubayeho.

Révérien Kamarampaka, yari umuyoboke w’ishyaka CNL ritavuga rumwe na Leta iriho mu Burundi, yishwe ku wa 18 Kanama 2019, nyuma umurambo we ubonwa mu kiyaga cy’igihangano cya Kabamba.

Uyu mupfakazi yatangarije Sosmedia/Burundi ko icyo ashaka ari ubutabera mu gihe ashimangira ko umugabo we yishwe n’abo mu ishyaka riri ku butegetsi, ubuyobozi bukemeza ko yiyahuye.

Avuga ko buri gihe asiragira ajya kuri komisariya ya polisi no ku biro bya Komini Ntega, asaba ko abashinjwa urupfu rw’umugabo we bashyikirizwa ubutabera. Amazina yabo yarayavuze.

Yagize ati ” Abicanyi bamukase umuhogo barangije bamujugunya mu mugezi nk’inyamaswa yoroheje, yari se w’abana batandatu, icyaha cye kimwe ni ukuba yari umuyoboke wa CNL, bambuza kurira ariko ntabwo bazambuza gusaba ubutabera kuko umugabo wanjye akeneye guhabwa ubutabera,…”.

Ashinja abayoboke babiri b’ishyaka CNDD-FDD kwica umugabo we, ati” Baramushimuse, ni Shirakumutima na Kagongo, Imbonerakure ebyiri zitagira ubwoba bwo kwigamba icyaha mu ruhame, nagerageje gukora ibishoboka byose nsaba ubutabera ariko ntabwo numvwa, nterwa ubwoba aho guhabwa ubutabera”.

Iki kinyamakuru ubwo cyaganiraga na Emmanuel Rwasa, uyobora Zone Rusubije, yagitangarije ko umugabo w’uyu mugore yapfuye yiyahuye, nyuma ngo uyu mugore ahita agira ibibazo byo mu mutwe kubera ishyano ryamugwiririye.

Ati “Révérien Kamarampaka yari umuyoboke mwiza wa CNL ariko yariyahuye yiroha mu kiyaga cya Kabamba, umugore ntabwo yabyakiriye,…”.

Yakomeje avuga ko bibaye ibishoboka uyu mugore yajyanwa mu bitaro byita ku barwayi bo mu mutwe(Hôpital psychiatrique).

Izindi wakunda

Bwiza.com