bwiza.com
Amakuru Iterambere ry'umuryango

Guv. Mufulukye yasobanuye impamvu Intara y’Iburasirazuba igaragaramo abangavu benshi baterwa inda

Intara y’Iburasirazuba niyo iza ku isonga muri raporo iheruka igaragaza uko abangavu baterwa inda hirya no hino mu gihugu, Guverineri w’iyi Ntara, Mufulukye Fred akavuga ko impamvu bakeka zirimo no kuba haba abimukira benshi.

Raporo ya 2018 yakozwe na Minisiteri y’Ubuzima, igaragaza Intara y’Iburasirazuba iza ku mwanya wa mbere mu Rwanda mu kugira abangavu benshi batewe inda zitateguwe, aho Akarere ka Nyagatare kabaye aka mbere dore ko gafite abangavu bagera 1465 batewe inda zitateganyijwe.

Guverineri w’Intara y’Iburasirazuba, Mufulukye Fred akeka ko impamvu intara ayoboye ari yo iri ku isonga biterwa n’ibice binini bikigaragaramo ibihuru, noneho abana bajya gutashya bakahafatirwa ku ngufu.

Mufulukye Fred ashyira mu majwi abaza gushakisha imirimo cyane cyane iy’ubuhinzi kuba ari bo batera inda abangavu ntibanite ku bana bavutse.

Yagize ati: “Ikindi twasanze hari abaturage bava mu bindi bice by’igihugu, baza wenda nko gushaka imirimo nko guhinga n’ibindi kuko hakigaragara ubutaka. Muri icyo gihe rero ugasanga wenda abana baje bakiri muri ubwo buzima, imiryango itarahama, itaratura neza.

Ugasanga na byo bifite ingaruka, bigatuma rimwe na rimwe abana batakurikiranywe, ababyeyi batari kumwe na bo. Izo ni zimwe mu mpamvu twagiye tubona ariko turacyacukumbura cyane kugira ngo tumenye neza ikibazo.”

Imibare y’abangavu batewe inda Minisiteri y’Ubuzima yabashije kumenya igaragaza ko umwaka wa 2018 warangiye Akarere ka Nyagatare kari ku isonga n’abana 1465 batewe inda, Gatsibo 1452, Gasabo 1064, Kirehe 1055 na Bugesera 925.

Radiotv10, ivuga ko Minisitiri w’Uburinganire n’Iterambere ry’Umuryango, Ambasaderi Solina Nyirahabimana, avuga ko abana baterwa inda ahanini biterwa no kudohoka kw’ababyeyi ku burere bw’abana babo.

Minisiteri y’Ubuzima igaragaza ko umubare w’abangavu babyara imburagihe wavuye ku bana 17,337 mu mwaka wa 2017 ugera ku bana 19,832 mu mwaka wa 2018. Nyamara imibare itangwa n’ubushinjacyaha bukuru igagaragaza ko kuva muri Nyakanga 2017 kugeza muri Kamena 2018, bakiriye dosiye 2,996 z’abasambanyije abana.

Izindi wakunda

Bwiza.com