bwiza.com
Amakuru Politiki

Uburengerazuba: Abagize urugaga rw’abagore muri FPR/ Inkotanyi basabwe kuzamura imibereho ya bagenzi babo

?

Ubuyobozi bw’intara y’uburengerazuba n’ubw’urugaga rw’abagore rushamikiye ku muryango FPR Inkotanyi muri iyi ntara,busanga kugira ngo abagore benshi b’ubushobozi buke bazamuke  mu iterambere banagere ubwo na bo bashobora gufasha abandi, hakenewe guhuza imbaraga,buri wese ugize icyo afite ntabe nyamwigendaho, akagira uwo afasha kuzamuka.

Babibwiwe na Guverineri w’intara y’uburengerazuba,Munyantwali Alphonse,  mu mahugurwa y’umunsi umwe,agamije kunoza imikoranire kugira ngo baharanire ko bagenzi babo bakiri mu bukene bukabije babuvamo byihuse, banishimira ko  kugeza ubu abagore 516 bo muri iyi ntara bahawe igishoro kibafasha muri gahunda yiswe ‘’one hundred women’’,aho buri mugore yahawe amafaranga 100.000, ngo bikaba bigenda neza kuko buri wese yahawe uzobereye mu bikorwa ayakoresha ngo amufashe kubiteza imbere.

Muri aya mahugurwa, buri mugore  uhagarariye abandi muri buri karere yahawe ijambo avuga uko imibereho y’abagore bo mu karere ke ihagaze, ibikimubangamiye mu iterambere n’icyakorwa ngo ave muri izi nzitizi, aho bigaragara ko amakimbirane mu ngo zimwe na zimwe, kwitinya kw’abagore mu gufata inguzanyo mu bigo by’imari bamwe  bitiranya n’ubunyangamugayo ngo batazahomba bagahemuka, ubumenyi buke mu mikorere no kubura igishoro gihangije,imyumvire ikiri hasi,n’ibindi,aba bagore basabwa ubufatanye mu kubihindura.

Mukakabogora Anastasie,umuyobozi wungirije w’uru rugaga muri  Nyamasheke, avuga ko kuba aka karere ari ko gakennye cyane mu gihugu abagore ari bo bahazaharira cyane kuko abafite ubushobozi bwo kwiteza imbere bakiri bake,imyumvire yo kumva ko kuzamura urugo bigiharirwa umugabo, n’ibindi  bakaba bagerageza guhindura iyi myumvire ngo umugore na we yumve ko iterambere ry’urugo ku ifaranga rimureba.

Ati’’twatangiriye ku bagore 75 buri wese ahabwa amafaranga 100.000 anahabwa  umuhora hafi mu mikorere ye, natwe turakurikirana uko bigenda kandi kugeza ubu nta ngorane  zirabonekamo, tukizera ko na bo bazafasha abandi,bityo bityo ku buryo nko mu myaka 2 iri imbere iyi myumvire ikidindiza iterambere izaba imaze guhinduka.’’

Nyiransengimana Donatille uyobora uru rugaga muri  Ngororero avuga ko abagore bo mu karere ke barenze ikibazo cy’imyumvire yo hasi mu kwizamura,basigaranye icy’ubushobozi bukiri buke,ari yo mpamvu naho  hari abafashijwe kwizamura bagikurikirana.

Ati’’Bafite ubushake,ubumenyi n’imbaraga zo gukora ariko baracyabura icyo baheraho bizamura,ni yo mpamvu twafashe 78 muri bo batishoboye kurusha abandi turabaremera ngo babashe kwizamura. Iyi mishinga 78 yaratangiye,turayikurikirana umunsi ku wundi,twizeye ko ikizavamo kizaduha ishusho y’ibikwiye gukorwa ngo buri mugore afashwe kuzamuka mu bukungu.’’

Mu gihe nanone bigaragara ko hari abagabo bamwe bashobora kubera imbogamizi iyi gahunda, umuyobozi w’uru rugaga ku rwego rw’iyi ntara,Nyiramana Peruth,avuga ko basanze ko mu mahugurwa y’aba bagore  bahawe igishoro,bajya bazana n’abagabo babo kugira ngo na bo bumvishwe uruhare bafite mu gutuma igera ku ntego ,bikazatuma nta mugabo uhirahira ngo ayibangamire, bakaniyemeza gufasha aba bagore bagenzi babo mu kubashakira amasoko y’ibyo bakora biheyereho  ubwabo bakababera isoko,ngo ntakizananirana.

Chairman w’umuryango FPR Inkotanyi ku rwego rw’iyi ntara akaba na Guverineri wayo,Munyantwali Alphonse, yavuze ko aba bagore 516 batangiriweho nibivana mu bukene bigaragara bizaha icyerekezo bagenzi babo bumvaga ko bidashoboka, asaba buri mugore urebwa n’iki gikorwa gushyira ikirenge mu mudugudu,uwahawe inkunga wese agasurwa umunsi ku wundi,ibibazo afite bikamenyekana,niba hari n’aho yigeza bigakorerwa raporo bikamenyekana, intego ikaba ko aba bafashwa guhinduka ba rwiyemezamirimo uyu munsi ejo baba ari bo bazafasha abandi bakiri hasi yabo kuzamuka.

Nubwo ngo hari abagore bakiri hasi mu iterambere,hari n’abandi bamaze kugaragaza ubushobozi ku buryo  bagira icyo bamarira bagenzi babo,cyane cyane mu nama n’ibitekerezo bibazamura, umunyamabanga w’uru rugaga ku rwego rw’igihugu,Hon. Murumunabo Cécile,akaba yabasabye kuva mu magambo n’amadisikuru asize umunyu bakajya mu bikorwa,bakazagaragaza ibifatika koko bizatanga ishusho y’ibishoboka no ku bandi bagore basigaye.

Buri mugore yasabwe gufasha mugenzi we arusha ubushobozi

Izindi wakunda

Bwiza.com