bwiza.com
Amakuru Politiki

Inyeshyamba za Gén. Nzabampema ziravugwaho gukora amabara muri Kivu y’Amajyepfo

Abaturage bo muri segiteri Itombwe, mu Ntara ya Kivu y’Amajyepfo muri Repubulika Iharanira Demokarasi ya Congo, batangaza ko bagabweho igitero n’inyeshyamba z’Abarundi za FNL ziyobowe na Gen Aloys Nzabampema, zifatanyije n’iza Maï-Maï.

Umuryango w’Abanyamulenge bo muri Segiteri Itombwe, Teritwari ya Mwenga, utangaza ko izi nyeshyamba z’Abarundi hamwe na Maï-Maï, zabagabyeho igitero ku wa Gatandatu tariki ya 7 Nzeri 2019.

Aba baturage bavuga ko izo nyeshyamba zatwitse inzu nyinshi mu gace ka Marunde, Tulambo, Rinjanja na Kivogerwa.

Ikinyamakuru sosmedias/Burundi gitangaza ko hari abishwe n’ubwo umubare utari wamenyekana, inkomere, ndetse ngo n’inka zisaga 400 ziribwa.

Izi nyeshyamba ngo zahunze nyuma yo gukozanyaho n’igisirikare cya Leta (FARDC) mu gace k’ishyamba hafi y’aka gace ka Intombwe.

Inyeshyamba za FNL zivugwa cyane muri Kivu y’Amajyepfo, muri Mata uyu mwaka nibwo Umuvugizi w’igisirikare cya Congo muri aka karere, Capt.Kasereka Dieudonne yatangaje ko igisirikare cya Leta cyakozanijeho nazo birangira 35 ku ruhande rw’inyeshyamba bahapfiriye.

Capt Kasereka yavuze ko ko muri izi nyeshyamba 35 z’Abarundi zishwe harimo n’abayobozi bakuru babiri, bafata n’imbunda zikomeye zarwanishaga.

Muri raporo zishyirwa ahabona na Loni, bigaragara ko muri Repubulika Iharanira Demokarasi ya Congo, hari imitwe itandukanye irwanya Leta ya Nkurunziza, irimo Red-Tabbara, uyu wa FLN wa Aloys Nzabampema na Forebu.

 

Izindi wakunda

Bwiza.com