bwiza.com
Amakuru Politiki

Bus yavaga i Kampala yakoze impanuka 7 bahita bapfa

Abantu barindwi bapfuye abandi 11 bakomerekera mu mpanuka ya bus yavaga i Kampala yerekeza i Kitgum.

Ni impanuka yabaye mu gitondo cyo kuri uyu wa Gatatu tariki ya 11 Nzeri 2019, ubwo bus itwara abagenzi yagonganaga n’ikamyo mu gace ka Namayonjo, mu Karere ka Nakasongola.

Nk’uko bitangazwa n’umuvugizi wa polisi ishami ryo mu muhanda, Mr Charles Ssebambulidde, avuga ko iyi bus ifite ibirango UAQ 643W ya kompani ‘Roblyn Coaches’ yagonganye n’igikamyo gifite ibirango UAX 001Y, i Namayonjo, agakeka ko impanuka yatewe n’uburangare bwa shoferi.

Yagize ati “Bus yajyaga mu Karere ka Kitgum ivuye i Kampala mu mujyi yicometse mu ikamyo yari ihagaze mu gace ka Namayonjo”.

Yakomeje avuga ko bikekwa ko shoferi yihutaga cyane noneho ntiyabasha kubona ko ikamyo iparitse, gusa ngo izi modoka zombi zarebaga mu cyerekezo kimwe.

Nk’uko bitangazwa n’ikinyamakuru Dailymonitor, umuyobozi wa polisi muri Nakasongola yemeje ko ari abantu batanu bahise bahapfira abandi babiri bapfira mu bitaro.

Izindi wakunda

Bwiza.com