bwiza.com
Amakuru Politiki

Gen. Prime Niyongabo yiswe ikigwari n’umugambanyi arusimbuka yapangiwe kwicwa

????????????????????????????????????

Mu gitondo cyo ku wa 11 Nzeri 2015, ahagana saa moya nibwo Gen Major Prime Niyongabo, umugaba mukuru w’ingabo z’u Burundi yagabweho igitero, ubwo yari ageze mu muhanda uzwi ku izina rya National 3 ugana Rumoge.

Iki gitero cy’abantu bari bitwaje intwaro cyahitanye abasirikare bari barinze uyu mugaba mukuru w’ingabo, ku bw’amahirwe we ararusimbuka bitewe n’imodoba yari arimo y’umutamenwa (blindé), bitangazwa ko yari iya gisirikare amasasu atabashaga kuyimena.

Cyakuye benshi umutima, bibaza ukuntu umugaba mukuru w’ingabo, uba afite abarinzi benshi bashobora, yaba yagabweho igitero. Biba nk’ikimenyetso cyagaragazaga ko umutekano wagerwaga ku mashyi mu gihe Leta yo yavugaga ko ibintu ari sawa.

Iki gitero cyateje urujijo, hibazwa ukuntu umugaba mukuru w’ingabo agabwaho igitero by’umwihariko atari no ku mupaka cyangwa mu ntara iyo kure, ahubwo ari mu murwa mukuru w’igihugu [Bujumbura].

Prime yiswe umugambanyi w’ikigwari

Ku wa 13 Gicurasi 2015, nibwo inkuru yakwiye isi yose ko Gen Niyombare na bagenzi be bo mu gisirikare cy’u Burundi bahiritse Perezida Nkurunziza ku butegetsi, nyuma iyi kudeta yaje gupfuba abari bayiyoboye bamwe barafatwa barafungwa abandi barahunga.

Gen Niyombare Godefroid wari uyoboye iyi kudeta na bamwe muri bagenzi be bari bahuje umugambi wo guhirika ku butegetsi Nkurunziza bahise bahunga igihugu nyuma yo kuneshwa, kugeza n’ubu aho bari hakaba hatazwi.

Gusa amakuru yagiye acicikana mu binyamakuru ni uko Coup d’Etat yapfubye bivuye ku kutumvikana k’uwagombaga kuba Perezida hagati ya Gen Niyombare na Gen Prime Niyongabo wanahise asubira ku ruhande rwa Nkurunziza.

Gen Cyrille Ndayirukiye, wahoze ari Minisitiri w’ingabo bivugwa ko yari yungirije Gen Niyombare muri uwo mugambi wa Kudeta, we yarafashwe hamwe na bagenzi be bagera kuri 27 ubu bakaba bakurikiranwe n’ubutabera bw’u Burundi, bashinjwa icyaha cyo kugerageza guhirika ubutegetsi bwabo [Ubu ubushinjacyaha bukaba bwarabasabiye gufungwa burundu].

Bivugwa ko umugambi wo guhirika ku butegetsi Nkurunziza wari urimo Gen Niyombare wahoze akuriye Iperereza, Gen Cyrille Ndayirukiye wahoze ari Minisitiri w’Ingabo, Gen Prime Niyongabo ubu ni umugaba w’ingabo ndetse na Gen. Gaciyubwenge na we wabaye Minisitiri w’Ingabo.

Ubwo byari bikomeye, nibwo Prime Niyongabo na Gaciyubwenge ngo bahise basubira ku ruhande rwa Nkurunziza, Niyombare na Gen Cyrille basigaraga bakukuza bafatanyine n’abandi basirikare n’abapolisi ariko kuba umugaba mukuru yari abivuyemo hamwe na Minisitiri w’ingabo, Kudeta ibananira ityo.

Abatari bashyigikiye Leta ya Nkurunziza bari batangiye no kubyina intsinzi, basubiye inyuma bita uyu Gen Prime Niyongabo kuba ikigwari ndetse ko yagambaniye bagenzi be, ariko ibyo nibyo byatumye Nkurunziza amugororera, ubwo yari amaze gushyira umutima hamwe, intebe ayigumanye.

Gaciyubwenge n’ubwo yari yasubiye ku ruhande rwa Nkurunziza, hadaciye kabiri yahise ahungira i Burayi.

Izi mvururu zose zavutse mu mwaka wa 2015 mu Burundi ubwo Nkurunziza yashakaga kwiyamamaza kuri manda ya Gatatu, zahitanye abasirikare bakomeye barimo nka Lt Gen Adolphe Nshimiyimana, Major Jean Bikomagu, Lt Col Darius Ikurakure, Brg Gen Athanase Kararuza, Major Muhimpundu,…

 

Izindi wakunda

Bwiza.com