bwiza.com
Amakuru

Kenya: Umunyeshuri yiyahuye nyuma yo kujya mu mihango ari mu ishuri, ababyeyi barigaragambya

Umunyeshuri w’imyaka 14 y’amavuko muri Kenya yiyahuye nyuma yo gusohorwa n’umwarimu ubwo yari amaze kugirira imihango mu ishuri, bituma ababyeyi bigaragambya.

Umubyeyi w’uyu mukobwa yavuze ko ku wa gatanu w’icyumweru gishize, umwarimu yamubwiye ko ari umwanda (umunyamwanda) kuko yanduje impuzankano, amutegeka gusohoka mu ishuri agahagarara hanze.

” Nta gikoresho yari afite cyo kwifashisha muri ibyo bihe. Ubwo amaraso yageraga mu myambaro ye, mwarimu yamutegetse gusohoka.” Umubyeyi yabwiraga itangazamakuru.

Uyu mubyeyi avuga ko umwana yageze mu rugo, amutekerereza uko byamugendekeye. Yiyahuye akoresheje umugozi ubwo yari yagiye kuvoma amazi.

Uyu mubyeyi yagiye kurega kuri polisi ariko ntiyagira icyo ibikoraho nk’uko Daily Nation ibivuga. Byatumye kuri uyu wa 10 Nzeri ababyeyi bagera kuri 200 bigaragambya ariko polisi irabatatanya. Imyigaragambyo bayikoreye ku ishuri rya Kabiangek uyu mukobwa yigagaho, aho bakuye urugi rwo ku marembo yaryo.

Mu 2017, Kenya yashyizeho ahantu ho gufasha abakobwa bari muri ibi bihe mu bigo by’amashuri bitewe n’uko abenshi badafite ubushobozi bwo kwigurira ibikoresho bibafasha ariko ntibiragera hose, ari yo mpamvu Inteko Ishinga Amategeko yahagurutse ngo imenye impamvu bitashyizwe mu bikorwa hose.

Raporo y’Umuryango w’Abibumbye yo mu 2014 ivuga ko umukobwa 1/10 muri Afurika yo munsi y’ubutayu bwa Sahara ahagarika amasomo ari mu bihe ‘by’ukwezi’. Bikavugwa ko kandi bamwe batakaza 20 % by’amasomo.

 

Izindi wakunda

Bwiza.com