bwiza.com
Featured Politiki

Ingingo Esheshatu zizigwaho mu nama igiye guhuza abayobozi b’u Rwanda na Uganda

Umunyamabanga wa Leta muri Minisiteri y’Ububanyi n’Amahanga, Ubutwererane n’Umuryango w’Ibihugu bya Afurika y‘Iburasirazuba, Nduhungirehe Olivier aremeza ko ku wa Mbere tariki ya 16 Nzeri 2019, mu Rwanda hateganijwe inama izahuza abayobozi barwo n’aba Uganda, aho bazaba bigira hamwe zimwe mu ngingo zo kuzura umubano w’ibi bihugu byombi.

Ni inama igiye kuba nyuma y’ubwumvikane bwo kurangiza amakimbirane hagati y’u Rwanda na Uganda bwashyizweho umukono ku wa Gatatu tariki ya 21 Kanama 2019, i Luanda muri Angola.

Amb. Nduhungirehe avuga ko iyi nama izaba igamije kuganira ku ngingo zose zikubiye muri aya masezerano y’i Luanda, kurusha uko bamwe batekereza cyane kuri imwe irebana n’iby’imipaka.

Ingingo A: Ni ivuga ko buri gihugu kigomba kubaha ubusugire bw’ikindi.

Ingingo ya B: Buri gihugu kigomba kwirinda gushyigikira imitwe yitwaje intwaro ishaka kubangamira umutekano n’ubusugire bw’ikindi gihugu.

Ingingo C: Guharanira uburenganzira bw’abaturage b’igihugu kimwe batuye mu kindi

Ingingo D: Guteza imbere ubuhahirane ku mipaka.

Ingingo E: Guteza imbere afurika ku bijyanye n’amahoro, ingabo, umuco, Ubucuruzi,…

Ingingo F: Irebana n’ibijyanye n’ishyirwaho rya Komisiyo ishinzwe kuganira ku ishyirwa mu bikorwa ry’aya masezerano, iyi komisiyo ikaba igizwe na ba Minisitiri b’Ububanyi n’amahanga, ab’ubutegetsi bw’igihugu n’abayobozi b’iperereza.

Amb. Nduhungirehe watangaje izi ngingo ubwo yaganiraga na VOA, yabajijwe umwuka waba uri hagati y’ibihugu byombi, ko nta gushondana kwaba kurimo mbere y’uko aya masezerano ashyirwa mu bikorwa.

Yasubije agira ati “Hari igikorwa cyakozwe n’abakuru b’ibihugu byombi kumwe n’abahuza, Perezida wa Angola n’uwa RDC mu gushyiraho umukono kuri aya masezerano, rero igikwiriye gukurikira ni ukureba uko yashyirwa mu bikorwa, gushyiraho umukono biroroshye ariko icyangombwa ni uko ashyirwa mu bikorwa, ni muri urwo rwego u Rwanda rwatumiye abayobozi ba Uganda bireba kugira ngo twicare tuganira ku buryo yashyirwa mu bikorwa”.

Yavuze ko iyi nama izaba mu cyumweru gitaha izaganirirwamo kuri izi ngingo ndetse ko bibaye ngombwa hazaba izindi nama zazayikurikira.

Abajijwe ikijyanye n’ifungurwa ry’umupaka kugira ngo ibihugu byombi byongere guhahirana nk’uko byari bisanzwe nta nkomyi, Amb. Nduhungirehe yasubije avuga ko iyo ari imwe mu ngingo zizaba zigwaho, ko itagerwaho ari iya Kane iza mbere zitarabonerwa umuti.

Ati “Ibyo uvuze by’umupaka ni ingingo ya D, imbere ya D hari ABC, kandi izi nizo zaba zikomeye kurusha D, ibyo twebwe twifuza ni uko ayo masezerano yose yashyirwa mu bikorwa cyane cyane ibibangamiye umubano w’ibihugu byombi.”

Umuvugizi wa Perezida Yoweri Museveni wa Uganda, Don Wanyama, aherutse kuvuga ko igikomeye mu byo abategetsi bombi bumvikanye ari ugufungura imipaka.

Wanyama yavuze ko ubu buri gihugu gitegerejweho gukora ibyumvikanyweho mu gihe cya vuba kugira ngo umubano hagati y’ibi bihugu umaze imyaka igera kuri ibiri warazambye wongere ube mwiza.

 

 

Izindi wakunda

1 Igitekerezo

Kigali: Abayobozi ba Uganda n’u Rwanda bari mu nama igamije gucoca ibibazo- AMAFOTO – bwiza.com 16/09/2019 10:32 am at 10:32 am

[…] Kanda hano usome inkuru bifitanye isano : Ingingo 6 bagiye kwigaho […]

Subiza

Tanga Igitekerezo

Bwiza.com