bwiza.com
Ahabanza » Nyamasheke/Kirimbi: Abahinzi b’umuceri barinubira igiciro bawugurishaho bagereranyije n’imvune bagira
Amakuru Politiki

Nyamasheke/Kirimbi: Abahinzi b’umuceri barinubira igiciro bawugurishaho bagereranyije n’imvune bagira

Abahinzi  b’umuceri bagera ku 2006 bibumbiye muri koperative’ Duhuze imbaraga Kirimbi –Macuba’ ihinga umuceri mu gishanga gihuza imirenge ya Kirimbi na Macuba mu karere ka Nyamasheke,bavuga ko imvune bavunika bawuhinga n’igiciro bahabwa iyo weze ntaho bihuriye, cyane cyane ko n’ibikenerwa byose ngo baweze byazamuye ibiciro nyamara  uruganda ruwubagurira ngo ntirubihe agaciro,bagasaba ko byasubirwamo bagakora bunguka,kuko uburyo ngo bakoramo ubu basanga bakorera mu gihombo gikabije.

Baganira na Bwiza.com,  bavuze ko iki gishanga cya Hegitari 127 mbere y’uko MINAGRI igitunganya cyahingwaga mu kajagari imyaka inyuranye itarabahaga umusaruro bifuza, gitunganywa babwirwa ko nigitangira guhingwamo umuceri bazaba bakize, nyamara ngo batunguwe no kuwuhinga,ubuyobozi bw’akarere bukabashakira n’uruganda ruwutunganya bibwira ko bagiye guca ukubiri n’ubukene, nyamara ngo ni bwo bumva bamera nk’abahingira ubusa kuko nta ntambwe n’imwe y’iterambere batera kubera igiciro gito bahabwa.

Bababazwa kandi ngo n’uko n’iki giciro bita gito kigenda gisubira inyuma uko umwaka utashye aho kwiyongera,nyamara ifumbire, amafaranga ahabwa umuhinzi n’ibindi bigenda ku buhinzi bwawo byo bikazamura igiciro ubutitsa,nko ku mwero w’iki gihembwe bakaba barahawe amafaranga 260 ku muceri  mugufi bita kigoli udatonoye,na 280 ku muremure,mu gihe ifumbire ya NPK bawukoreshaho yaguraga amafaranga 520 igeze kuri 615 ku kilo,ire yaguraga 430 igeze kuri 525,n’ibindi byose bigahenda.

Mukaneretse Euphrasie utuye mu kagari ka Rugali mu murenge wa Macuba ybwiye Bwiza.com ati’’ tumeze nk’abahingira ubusa pe, kuko nkanjye ubu ngiye gutahana amafaranga  22.540 n’amezi yose maze nywuhinga. Nejeje ibilo 127 kubera ko agace tuwuhingamo kadatunganije neza,aya mafaranga ni yo bagiye kumpa havuyemo ayo badukuraho yose. None se kumara amezi agera kuri 5 wita ku muceri nta kindi wimarira,wajya gusarura ugacyura aya mafaranga nta n’ikilo wisigarije cyo kurya ukazajya kugura mu mabutiki nk’abatarawuhinze,wavuga ngo iyi ni inyungu?’’

Yarakomeje  ati’’ imirimo ikorwa mu buhinzi bw’umuceri ubanza ititabwaho neza iyo hagiye gushyirwaho igiciro cyawo kuko nkanjye kurima umurima nzawuteramo bintwara amafaranga 4000,kuwucoca neza 4000,kongera kuwutunganya neza mbere yo gutera 3000,guteresha 5000, kubagara ubwa mbere 3.000,ubwa 2 na bwo ntanga 3.000,ubwa 3 ngatanga 2.000,kurinda inyoni 8.000,gusarura 8.000,ubwo sinabaze ay’ifumbire, ibyo njye nkoramo,kurya no kugaburira uwampingiye kuko atakwirirwa ahinga ngo atahe atariye,hanyuma wakwera abatarigeze bagera mu murima ngo barebe imvune yawo  ngo bakiga ibiciro bakabituzanira tugakora duhomba.’’

Umuyobozi w’iyi koperative Nyabyenda Pierre na we yemeza ko igiciro bahabwa ntaho gihuriye n’imvune bavunika nubwo iyo gishyirwaho,MINICOM,MINAGRI,inganda ziwutunganya  n’abahagarariye abahinzi bahurira hamwe bakacyemeranyaho,ariko ngo hari ibindi izo nzego zirengagiza zitareka ngo abahinzi bazisobanurire neza,zituma igiciro kigenda gisubira inyuma umuhinzi akahagwa.

Ati’’iki giciro kirabangamye rwose ntitubica ku ruhande,ntigihuye n’imvune y’umuhinzi n’ibindi byose byazamutse  bikenerwa ngo were,nubwo n’inganda zitugurira hari ibyo zigaragaza,ariko usanga dusa n’aho ari zo dukorera twe tugatahira aho,tukifuza ko ubutaha byarebanwa ubushishozi, kuko bikomeje gutya abahinzi bazajya bawukorera birozonga kandi  twari twashimye Leta cyane yadutunganirije iki gishanga,ariko inganda ziwutunganya zikomeje kutwunamaho cyane nubwo tuzi ko atari zo zonyine zigena icyo giciro.’’

Habinshuti Johnson,umucungamutungo w’uruganda rutunganya umuceri rwa Nyamasheke rukorana n’aba bahinzi binavugwa ko ari bo rwashyiriweho,avuga ko koko umuceri uvuna mu kuwuhinga ariko n’inganda zigaragaza ibyo zitakaza ziwutunganya,ibiciro bigashyirwaho habanje kureba ibyo impande zombi zitakaza kandi ngo gishyirwaho n’abahagarariye abo bahinzi babigizemo uruhare.

Avuga ko abona ko kugira ngo umuhinzi ahabwe  igiciro yishimiye ari uko hatangwa imbuto z’umuceri zibasha guhangana n’uturuka hanze n’igiciro cyawo kigahangana n’icy’uhaturuka kuko izo bahinga zidafite ubwiza nk’ubw’izo zindi,icyakora ngo ababishinzwe babijeje ko biri gukorwa,agasanga ari byo bishobora kugikemura.

Aba bahinzi bavuga ko bifuza ko nibura ku muceri mugufi bahabwa amafaranga 300 ku kilo cy’udatonoye,umuremure bagahabwa 320 ,umuyobozi w’agateganyo w’aka karere,Ntaganira Josué Michel akavuga ko bagiye  kubashishikariza kongera ubwinshi n’ubwiza bwawo, kuko ngo banemerewe kwaguka kw’isoko igihe batishimiye igiciro bahabwa n’uruganda rubegereye n’abashoramari baturutse ahandi bakaba bawubagurira igihe babaha icyisumbuyeho. 

Bavuga ko bakoresha imbaraga nyinshi batunganya umuceri

 

 

Uyu mubyeyi avuga ko hakwiye kwigwa uburyo igiciro bahabwa cyakwiyongera

Izindi wakunda

Bwiza.com