bwiza.com
Ahabanza » Uganda yiteguye gushyira mu bikorwa amasezerano ya Angola-Minisitiri Sam Kutesa
Amakuru Politiki

Uganda yiteguye gushyira mu bikorwa amasezerano ya Angola-Minisitiri Sam Kutesa

Komisiyo y’u Rwanda n’iya Uganda yashyizweho mu rwego rwo kureba ishyirwamubikorwa ry’amasezerano ya Angola agamije kubyutsa umubano w’u Rwanda na Uganda yahuriye mu biro bya Minisiteri y’Ububanyi n’amahanga i Kigali kuri uyu wa 16 Nzeri 2019.

Ku ruhande rw’u Rwanda, iyi komisiyo ihagarariwe na Amb. Olivier Nduhungirehe, umunyamabanga wa leta muri Minisiteri y’Ububanyi n’Amahanga. Uruhande rwa Uganda rwo ruhagarariwe na Minisitiri w’Ububanyi n’Amahanga, Sam Kutesa.

Iyi nama kandi yitabiriwe na Minisiteri w’Ububanyi n’Amahanga wa Angola, Manuel Domingos Augusto, umujyanama muri Ambassade ya Angola mu Rwanda, Horacio Uliengue, Gilbert Kankonde MALAMBA, Minisitiri w’Intebe wungirije wa Repubulika Iharanira Demukarasi ya Congo (RDC) na  Inzun Justin Kakiak, Umuyobozi w’Urwego rw’Ubutasi muri RDC, baje nk’abahuza.

Sam Kutesa yavuze ko abaturage b’ibihugu byombi bifuza umubano mwiza kandi yizeza ko igihugu cye cyiteguye gushyira mu bikorwa ibikubiye mu masezerano ya Angola.

Ibi bishimangirwa na Amb. Olivier Nduhungirehe na we wavuze ko u Rwanda rufite ubushake bwo gushyira mu bikorwa ibikubiyemo kandi rubyiteguye.

” Amasezerano ya Angola ni ingenzi ariko ishyirwamubikorwa ryayo ni rwo rufunguzo rwo kubyutsa umubano w’u Rwanda na Uganda. Ndabizeza ko u Rwanda rwiteguye gushyira mu bikorwa aya masezerano.” Olivier Nduhungirehe.

Ku wa 21 Kanama, Perezida Kagame na Museveni wa Uganda basinyiye amasezerano muri Angola, agamije kubyutsa umubano w’ibihugu byombi no gusigasira umutekano mu karere. Bageze i Luanda ku butumire bwa Perezida João Lourenço w’Angola, Felix Tshisekedi wa RDC na Denis Sassou Nguesso wa Congo bitabira nk’abahamya.

Hashyizweho komisiyo ishinzwe kureba ishyirwamubikorwa ry’aya masezerano igizwe na bamwe mu bayobozi bo mu Rwanda na Uganda.

Nyuma yo gusinya aya masezerano, abaturage b’ibihugu byombi bari biteze: gufungura Abanyarwanda bafungiwe muri Uganda mu buryo butubahirije amategeko, gufungura imipaka; ubuhahirane bukoroha no gufungura ibinyamakuru bikorera kuri murandasi.

Hari andi makuru yavuzwe ko Uganda ifasha imitwe ishaka guhungabanya umutekano w’u Rwanda. Mu ngingo yo gusigasira ubusugire bw’igihugu gituranyi n’akarere, u Rwanda rwifuza ko Uganda yahagarika izi mfashanyo n’ubwo ubwayo yahakanye kenshi ko ifasha iyi mitwe.

 

 

Izindi wakunda

Bwiza.com