bwiza.com
Ahabanza » Ruhago: Amakuru avugwa ku mugabane w’Uburayi
Amakuru Imikino

Ruhago: Amakuru avugwa ku mugabane w’Uburayi

Amakuru atandukanye avugwa ku mugabane w’Uburayi muri ruhgo ni uko Liverpool yatangiye ibiganiro na rutahizamu wayo Sadio Mane ukomoka muri Sénégal ku kumuha kontaro nshya y’imyaka itanu n’igice yo kuyikinira yatuma Mane w’imyaka 27 aba ari we mukinnyi uhembwa amafaranga menshi cyane kurusha abandi muri iyi kipe.

Yajya ahembwa arenga ibihumbi 220,000 by’amapawundi ku cyumweru.

David Silva wahoze akina hagati mu ikipe y’igihugu ya Espanye, azajya gukina mu ikipe Inter Miami ya David Beckham yo muri shampiyona ya Major League Soccer muri Amerika, ubwo uyu mukinnyi w’imyaka 33 azaba avuye muri Manchester City mu mpera y’uyu mwaka w’imikino. (Independent)

Real Madrid byayisaba gutanga arenga miliyoni 80 z’ama-Euro mu gihe yaba ishatse kwirukana umutoza Zinedine Zidane. (Sport).

Hagati aho, Barcelone iri mu mugambi wo kugurisha abakinnyi bamwe na bamwe mu kwezi kwa mbere – barimo Ivan Rakitic w’imyaka 31 ukomoka muri Croatia ukina hagati, Umufaransa Samuel Umtiti w’imyaka 25 ukina nka myugariro ndetse na Arturo Vidal w’imyaka 32 ukomoka muri Chili ukina hagati. (Marca)

Barcelone na yo yageze mu mubare w’amakipe yifuza rutahizamu Erling Braut Haaland w’imyaka 19 ukomoka muri Norvège, watsindiye ikipe ye ya Red Bull Salzburg ibitego bitatu mu mukino we wa mbere wa Champions League, ubwo bakinaga na Genk ku wa kabiri. (Mundo Deportivo).

Alf-Inge, se wa Erling Braut Haaland, avuga ko byaba “byiza” umuhungu we agiye muri Manchester United nubwo bwose uwo se w’imyaka 46 yakinnye mu makipe macyeba yayo ya Leeds United na Manchester City ubwo yari akiri umukinnyi. (TV2)

Umutoza Brendan Rodgers wa Leicester City avuga ko kuba amakipe nka Liverpool cyangwa Manchester United yakwifuza kugura James Maddison, umukinnyi wo hagati w’Ubwongereza w’imyaka 22, byaba ari ikintu gikomeye atakwitesha. (Sun)

Amakipe aramutse yifuje Maddison, ikipe ye ya Leicester City yasaba amafaranga angana na miliyoni 80 z’amapawundi United yatanze mu kugura myugariro w’Ubwongereza Harry Maguire w’imyaka 26, ku mpeshyi. (Standard).

Stan Kroenke, nyir’ikipe ya Arsenal, yashoye amafaranga ye bwite mu kugura abakinnyi kuri iyi mpeshyi aho gushingira ku buryo busanzwe bw’ikipe bwo kwigurira abakinnyi bijyanye n’amikoro yayo. (Mirror)

Umudage Shkodran Mustafi ukina nka myugariro muri Arsenal avuga ko yiteguye kuva muri iyi kipe mu gihe yaba abonye kontaro nziza mu ikipe y’iwabo mu Budage. (Mail)

Chelsea yizeye ko imvune yo ku kagombambari umukinnyi wayo Mason Mount w’imyaka 20 unakina nka rutahizamu mu ikipe y’Ubwongereza yagize ubwo bakinaga na Valencia ku wa kabiri, idakomeye cyane nkuko iyi kipe yari yabanje kubyibaza. (Standard).

Leicester City yohereje abakozi bayo kwitegereza imikinire ya myugariro Andre Almeida w’imyaka 29 ukomoka muri Portugali ubwo ikipe ye ya Benfica yakinaga na RB Leipzig muri Champions League ku wa kabiri. (Record, via Leicester Mercury)

Umukinnyi Xherdan Shaqiri w’imyaka 27 w’Ubusuwisi, avuga ko yumva “abihiwe gacye” kubera kudakinishwa muri Liverpool muri uyu mwaka w’imikino, ariko ashimangira ko yumva “yisanzuye” ku kibuga Anfield. (Liverpool Echo).

Everton na Newcastle zimaze igihe zigenzura imikinire ya rutahizamu Josef Martinez w’imyaka 25 ukomoka muri Venezuela ukinira Atlanta United. (Chronicle)

Rutahizamu Romelu Lukaku wa Inter Milan na mugenzi we bakinana Marcelo Brozovic, bakijijwe na Alexis Sanchez nyuma y’ubushyamirane bagiranye mu rwambariro bamaze kunganya igitego 1 – 1 na Slavia Prague muri Champions League ku wa kabiri. (Mail)

Izindi wakunda

Bwiza.com