bwiza.com
Ahabanza » Indege yasubitse urugendo bitewe n’isuhuzanya ry’abayisilamu babiri
Amakuru

Indege yasubitse urugendo bitewe n’isuhuzanya ry’abayisilamu babiri

Kompanyi y’indege yo muri  Amerika yitwa Mesa Airlines yahagaritse urugendo nyuma y’aho abagenzi n’abakozi bavuze ko bakemanze indamukanyo y’abagabo b’abayisilamu; Abderraoof Alkhawaldeh na Issam Abdallah bari bayirimo.

Itangazo ry’iyi kompanyi y’indege rivuga ko impungenge zazamuwe n’abakiriya ku bijyanye n’umutekano wabo ari izo guha agaciro.

Riti “ Amerika n’abantu bayo bose bafite inshingano no guhora bazirikana umutekano w’abakozi n’abakiliya.”

Aljazeera na BBC dukesha iyi nkuru bivuga ko aba bagabo b’abayisilamu bavaga ahitwa Birmingham muri Leta ya Alabama berekeza Dallas Texas muri Leta ya Texas kuwa 14 Nzeri 2019.

Ngo aba bombi ntibari baziranye, ariko ubwo bahuriraga mu ndege basanzwe baziranye ku bw’idini maze barasuhuzanya, ibintu byateye icyikango abagenzi n’abakozi ba Kompanyi Mesa Airlines.

Abdallah, umwe muri aba babiri yabwiye abanyamakuru ko hari urwikekwe ku buryo igihe yajyaga mu bwiherero, umwe mu bakozi b’iyi kompanyi, yaje hafi y’umurayngo ngo yumvirize ibyo ari gukora.

Mugenzi we, Alkhawaldeh yavuze ko yumvise umukozi w’iyi kompanyi abwira abandi bagenzi gusohoka mu ndege vuba ku bw’umutekano wabo.

Aba bombi bemeza ko basatswe bakigera hanze ndetse ko Alkhawaldeh yahaswe ibibazo n’umukozi wa FBI, akanasaka umuzigo we indi nshuro.

Uyu mukozi wa FBI yabwiye Alkhawaldeh ati “ Ikibazo ngo ni uko wagiye mu bwiherero ugafungura amazi inshuro ebyiri.”

Alkhawaldeh ati “ Ntekereza ko ari ivangura rishingiye ku ruhu no ku idini byanjye.”

Kompanyi ya Mesa isanzwe izwiho kugira ivangura, ibirego ifahwema guhakana ivuga ko byose bikorwa mu nyungu z’umutekano w’abakiliya.

 

 

 

Izindi wakunda

Bwiza.com