bwiza.com
Ahabanza » Nyabihu/Rugera: umuturage arashinja umwarimu gukubita umwana we akamuvuna umugongo
Amakuru Mu mashuli

Nyabihu/Rugera: umuturage arashinja umwarimu gukubita umwana we akamuvuna umugongo

Umuturage wo mu Mudugudu wa Bukango, Akagari ka Rurembo mu Murenge wa Rugera, Damascene Hitimana arashinja umwarimu witwa Fabien Mponge gukubita umwana we Izikugena Flavia wiga mu mwaka wa gatandatu w’amashuri abanza ku Rwunge rw’Amashuri rwa Murama.

Hitimana yabwiye Bwiza.com  ko uyu mwana w’umukobwa w’imyaka 15 yakubiswe kuwa Kane 19 Nzeri mu 2019 saa tatu za mu gitondo, ubuyobozi bumumenyesha saa cyenda z’igicamunsi. Avuga ko yageze ku ishuri agasanga umwana we yavunitse umugongo, yemeza ko ari asanzwe awurwara.

Yagize ati “ Nigeze kumuvuza umugongo mu myaka ibiri n’igice ishize ku Bitaro bya Shyira. Uwo mwarimu yabateguriye isomo kuwa Gatatu rirabananira abakubita inkoni umunani, ababwira ko azabakubita 12  nibaramuka bataryumvise kuwa Kane. Bagarutse bataryumvise, ariko njye nari narababwiye ko umwana wanjye bazajya bamureka kuko arwaye umugongo. Yafashe agati arakamukubise,umwana ahita avunika.”

Hitimana avuga ko ikimubabaje ari uko umwana we yakubiswe akavunika, kandi yari yaravuze ikibazo uyu mwana afite. Yemeza ko bigaragara ko ari impanuka, ariko ko yabikoze abizi. Avuga ko ababajwe no kuba ari we uri kuvuza umwana we wenyine, mu gihe uwamuvunnye ntacyo amufasha.

Ati “  Yari babizi ko umwana arwara umugongo. Mpangayikishijwe n’uko barenze ku bintu bazi neza. Ubusanzwe bamuhanga nk’igihe yakererewe ariko bagakubita ku maguru, ku kibuno no ku maguru. Yamukubise kubera ko abandi bana bamubajije impamvu atamuhana nk’abandi, ahita amukubita. Ikibazo mfite ni ukumukubita bakantererana, mba mbona ikigo kidashaka kumfasha nk’uko ubuyobozi bwari bwabinsezeranyije. Kuri ubu maze kutakaza Frw 38,000. Numva akwiye kumfasha kuko yamukubise abizi.”

Hitimana avuga ko nibikomeza gutya, ari bugane inkiko cyane ko ngo yanze kujya kuri polisi kubera ko yumvaga ko mwarimu Mponge yari atabigambiriye.

Mwarimu Mponge avuga ko uyu mwana yamubwiye nabi kuko yari mu itsinda ryagize amanota make, avuga ko atari aziko afite ikibazo cy’uburwayi bw’umugongo, amakuruahabanye n’atangwa n’umubyeyi. Avuga ko yafashije umubyeyi w’umunyeshuri kugeza umwana ku Bitaro, akishyura ibihumbi Frw 20,000,bemeranya ko birangiye.

Ati “  Ayo makuru si yo. Sinari nziko uyu mwana yarwaye umugongo hafi umwaka wose. Se yambwiye ko iyo yikanze gato, umugongo ugira ikibazo. Namuhaye ibihumbi 20, ampa agapapuro kemeza ko nta kibazo dufitanye. Ubusanzwe uriya mugabo[Hitimana] ni mubyara wanjye, sina kwanga kumusura kuko umunyeshuri nigisha sinagira ikibazo ngo ntamusura. Nta mutima mubi mfite wo kwanga umwana. Namusaba gukomeza kurwaza umwana.”

Umuyobozi Wungirije Ushinzwe Amasomo ku Rwunge rw’Amashuri rwa Murama, Vincent Hakizimana yahakanye ko uyu mwana w’umukobwa yakubiswe, yemeza ko uyu mwana asanzwe agira ikibazo cyo kwikanga ndetse ko umubyeyi we yari amaze igihe atamujyana kwa Muganga. Avuga ko atigeze amenyeshwa ko uyu mwana yakubiswe.

Ati “ Uwo munyeshuri yari asanzwe afite ikibazo cy’umugongo. Uwo mwana yigeze kujyanwa kwa muganga kubera icyo kibazo. Asanzwe afite ifishi ya mbere ku bana bafite ibibazo mu myigire. Uwo mwana iyo ari mu ishuri ashobora kwikanga, akaba yasubizwa kwa muganga.”

Hakizimana yahakanye ko uyu mwana yakubiswe saa tatu kuko ngo yamubonye saa sita ari muzima.

Ati “ Sinabibonye,nta n’ibyo bambwiye. Njye nagiye kumureba ubwo bari bantabaje bamwira ko wa mwana agize ikibazo. Se nari mperutse kumubaza impamvu atakijyana umwana kwa muganga ambwira ko ngo yabiretse kuko abona umwana nta kibazo afite.”

N’ubwo Hakizimana avuga ibi, umwe mu bari aho utashatse ko amazina ye atangazwa yavuze ko uyu mwana yakubiswe kandi ko yahishwe mu cyumba cy’ishuri kugira ngo itsinda ry’abagenzuzi ryari rivuye muri minisiteri y’Uburezi, ritamubona. Aya makuru ahakanwa na mwarimu Fabien Mponge, uvuga ko uyu munyeshuri yagize ikibazo iri tsinda ryagiye.

Kuri ubu Izikugena Flavia ari kugurikiranwa n’abaganga ku Bitaro bya Shyira nk’uko umubyeyi we Hitimana abyemeza.

 

Izindi wakunda

Bwiza.com