bwiza.com
Ahabanza » Kirehe: Abiga ubutabire n’ubugenge banezezwa no kuba ibyo biga babibyaza umusaruro
Amakuru Mu mashuli

Kirehe: Abiga ubutabire n’ubugenge banezezwa no kuba ibyo biga babibyaza umusaruro

Abanyeshuri n’abarimu bigisha ku rwunge rw’amashuri rwa Gacuba mu  Murenge wa Musaza,  mu Karere ka Kirehe baremeza ko integanyigisho nshya kuyishyira mu bikorwa byabaye intwaro bifashisha mu gukundisha abana ishuri no kubarinda guterwa inda bakiri bato.

Abanyeshuri bavuga ko gushyira mu bikorwa ibyo biga mu masomo y’ubutabire n’ubugende ndetse n’ibinyabuzima  byatumye barushaho kumenya akamaro ko kwiga no kubyaza umusaruro amasomo biga.

Uwase Deborah ni umwe muri aba banyeshuri bemeza bamaze kumenya akamaro ko kwiga ndetse ko nta mwana uzongera guta ishuri.

Yagize ati “Twiga amasomo ariko ikidushimisha kurushaho ni uko ibyo twize ubu tubasha no kubishyira mu bikorwa ku buryo byatumye tumenya akamaro ko kwiga ,twatangiye gukora ingendoshuri no kujya gushyira ibyo twiga mu mikoro ngira, ababyeyi batwishyurira amafaranga tukajya kuri Rusumo high School  muri laboratwari kandi byatumye twibumbira mu matsinda dutangira gukora ibyo twize tukabyaza umusaruro ibihingwa bihingwa hano dukora  nk’inyama muri soya, dukora imitobe mu nanasi ndetse tugakora ibiribwa byitwa Merci Madamu gituma turwanya imirire mibi miryango yacu, hari abakora amasabune na siraje ku buryo nta mwana wiga ku kigo cyacu ngo agire umwanda”.

Uwase arakomeza avuga ko abana b’abakobwa ibikorwa bakorera ku kigo cyabo bizabafasha no kwirinda guterwa inda bakiri mu ishuri.

Yagize ati “Nkatwe abakobwa nta muntu wadushuka ku buryo twaterwa inda kubera irari, ibyo ababyeyi bacu badashobora kuduha tubasha kubyigurira kubera ibikorwa dukorera hano ku ishuri bituma tubona amafaranga dukemuza ibibazo dufite”.

Mutabaruka Jean Claude yishimira kuba ibyo biga babibyaza umusaruro bigatuma bakunda ishuri ndetse bakiga biteza imbere.

Yagize ati “Uburyo batwigishamo bwatumye tubona ko ibyo twiga bifite akamaro kuko iyo ubona ko hari ibintu wivumburiye bitewe no kwiga bituma ukunda kwiga cyane, ubundi twigaga nka Chemestry na Biology ntitubyumve neza ariko iyo ubona ushobora gukora siraje cya amasabune yo kumesa ndetse n’ayo gukora isuku bituma twumva ko twakora ibirenze ibyo dukora”.

Havugimana Philippe umwe mu  barimu bafasha abo banyeshuri, yemeza ko ubushakashatsi akora bufasha abanyeshuri kuvumbura no guhanga udushya  bigatuma bitegura kuzahangana n’ubushomeri bihangira imirimo.

Umuyobozi wa G.s Gacuba, Habimana Modeste yemeza ko gushyira mu bikorwa  integanyanyigisho byababereye intwaro yo gukundisha abana ishuri no kubafasha kwiga bafite intumbere.

Ati “Minisiteri y’uburezi imaze guhindura integanyanyigisho ya mbere yari ishingiye ku bumenyi inshya iza ishingiye ku bushobozi, aho umwana ibyo yize agomba kubishyira mu ngiro,hashize imyaka ibiri tujyana abanyeshuri ku kigo cya Rusumo High School kandi byatanze umusaruro kuko abana ubu bakunda kwiga bitewe n’uko batangiye kujya bifashisha ibyo biga bakakoramo ibikorwa byabateza imbere”.

Avuga ko babibonamo amafaranga abafasha no kuzigama, nibura buri shuri ngo rizigama amafaranga ibihumbi magana atatu kandi iyo hashize umwaka baragabana bakiteza imbere, bamwe bakaguramo amatungo ku buryo ngo nta mwana wabura ibikoresho by’ishuri.

Abanyeshuri b’abakobwa bavuga ko ntawabashukisha ibintu ngo baterwe inda

 

Ngabonziza Justin/ Bwiza.com

Izindi wakunda

2 Ibitekerezo

Twahirwa jean baptiste 23/09/2019 11:23 am at 11:23 am

Nishimiye kumenya ibyo bikorwa byiza bikorerwa Gs Gacuba nibyiza cyane nibakomerezaho

Subiza
HAVUGIMANA Philippe 24/09/2019 7:39 am at 7:39 am

G S GACUBA twifuza gukomeza neza tukarenga intera turiho ubu ariko tugomba kwita kuri Competence Based Curriculum mu gushyira mu bikorwa CBC.

Subiza

Tanga Igitekerezo

Bwiza.com