bwiza.com
Ahabanza » Musanze: Umugabo akekwaho kwica umugore we akoresheje umuhini
Amakuru

Musanze: Umugabo akekwaho kwica umugore we akoresheje umuhini

Nizeyimana Jean Damascene utuye mu Karere ka Musanze, umurenge wa Kinigi mu kagari ka Nyonirima akekwaho kwica umugore we Nyiramahirwe Solange amukubise umuhini mu masaa sita y’ijoro ryo kuri uyu wa 27 Nzeri 2019.

Nk’uko bitangazwa n’Umunyamabanga Nshingwabikorwa w’umurenge wa Kinigi, Rudasingwa Agire Fred avuga ko aba bombi bavuye ku kabari basinze, umugabo ashwana n’umugore bararwana, ni bwo yaje kumukubita umuhini arapfa.

“Barwanye mu gihe cy’amasaa sita y’ijoro batashye bavuye kunywa, umugabo akubita umugore umuhini, aramwica.” Rudasingwa Agire Fred.

Rudasingwa avuga ko Nizeyimana akimara kwica Nyiramahirwe yabanje kubihisha. Urugo rwari rusanzwe  rubamo n’umukazana wabo. Saa kumi n’ebyiri n’igice ni bwo bahamagaye umuyobozi w’umudugudu, bamubwira uko byagenze.

Nyuma yo kumenya aya makuru, ubuyobozi bw’umurenge, inzego z’umutekano ndetse n’Urwego rw’Ubugenzacyaha ku murenge, bagiye aho icyaha cyakorewe.

N’ubwo batigeze babigeza ku nzego z’ubuyobozi, Nizeyimana w’imyaka 37 na Nyiramahiwe w’imyaka 30 bari basanzwe bafitanye amakimbirane. Nizeyimana afite abana batatu yabyaranye n’umugore batandukanye, akaba yashinjaga Nyiramahirwe kubafata nabi.

Nizeyimana Jean Damasecene ubu uri mu maboko y’ubugenzacyaha yemera ko ari we wakoze iki cyaha. RIB kandi yatwaye umurambo wa Nyiramahirwe kugira ngo upimwe ku mpamvu y’iperereza.

Izindi wakunda

Bwiza.com