bwiza.com
Ahabanza » Nyamasheke: Min. Shyaka yasabye abayobozi b’Imidugudu gutangira serivisi ahazwi
Amakuru Politiki

Nyamasheke: Min. Shyaka yasabye abayobozi b’Imidugudu gutangira serivisi ahazwi

Minisitiri w’ubutegetsi bw’igihugu,Prof.Shyaka Anastase avuga ko nubwo urwego rw’umudugudu rutari  mu nzego z’imitegekere bwite za Leta, rukwiye kugira aho rukorera heza kandi hazwi.

Yabivuze ubwo kuri uyu wa gatandatu yifatanyaga n’abaturage b’umudugudu wa Nyagahingamu kagari ka Vugangoma mu murenge wa Macuba mu karere ka Nyamasheke mu muganda usoza uku kwezi kwa Nzeri,aho yashyize ibuye ry’ifatizo ahazubaka ibiro by’uyu mudugudu wa Nyagahinga, akanifatanya na bo gusiza ikibanza cy’ahazubakirwa umuturage utishoboye,hanashingwa imbago z’ahazubakwa gereza  izimurirwamo abafungiye muri gereza nkuru ya Rusizi,nyuma akaganira n’abatuye uyu murengeuburyo barushaho kwiteza imbere.

Aganira n’itangazamakuru,Min. Prof.Shyaka Anastase  yavuze ko uru ari urwego rukomeye cyane mu bukangurambaga bukorerwa abaturage,hari n’ibibazo byabo rukemura  bigafasha abaturage kurushaho gutekana no kwirinda amakimbirane, abarugana bakaba bagomba kugira aho barusanga heza,hasukuye , n’uburyo bwo gukemura ibyo bibazo bunoze,bitandukanye no gushaka Mudugudu ukamuhamagara kuri telefoni,kumusanga iwe cyangwa ahandi hatari aho gukemurira ibibazo byabo,kuba ari n’abaturage biyubakira inyubako z’ibiro byabo bikaba ari akarusho.

Ati’’ kuba rero bagira aho bakorera heza,hagaragara,habegereye,ni ikintu tubona ko ari cyiza cyane,kizafasha mu gukomeza cyane cyane kuzamura ubukangurambaga no kwimakaza umutkano n’umudendezo mu baturage kubera ko aho abaturage bahererwa serivisi z’ibanze haba habegereye.’’

Baganira na Bwiza.com,bamwe muri aba baturage bavuze ko ari bo bisabiye kwiyubakira ibi biro kuko ngo bari barambiwe gusanga umukuru w’umudugudu wabo aho ari ho hose harimo mu rugo rwe, mu murima ,munsi y’ibiti,kumuhamagara kuri telefoni ,n’ubundi buryo butajyanye n’iterambere, aho umuyobozi nk’uyu atagira aho akorera hazwi,ngo  biba byoroshye gutanga no guhabwa ruswa bikagorana kumenyekana bitewe n’aho ukemura n’ukemurirwa ibibazo bahuriye,cyane cyane nk’abahurira mu tubari.

Mukakayibannda Donatha,umwe mu batuye uyu mudugudu yagize ati’’ twishimiye kuba tugiye gutera intambwe ikomeye yo kwigirira ibiro by’umudugudu wacu  n’abayobozi bakuru barimo na Minisitiri w’butegetsi bw’igihugu bakaba baje kudutera ingabo mu bitugu, banatwijeje ko mu mezi atarambiranye bizaba byuzuye. Bizadufasha  cyane kuko hari igihe kubona umuyobozi w’umudugudu bitugora,kumusanga mu rugo,mu murima cyangwa mu yindi mirimo ye ntagukemurire ikibazo neza nk’uko wamusanga ku rwego ruziwi rw’ubuyobozi.

Birumvikana cyane ko umusanze nko mu kabari utabura kumugurira icupa ngo unamwongeze irindi kugira ngo yihutishe ikibazo cyawe,umusanze mu murima kumukuramo ngo agukemurire ikibazo   bikagorana ariko kwiyubakira ibiro bizagenda bikemura ibyo bibazo byose.’’

Bamwe mu bakuru b’imidugudu barimo n’uw’uyu ugiye kubakirwa ibiro Nzarora Mafurebo, bavuga ko na bo hari igihe bafatwa n’abaturage iminsi yose bagombye kugira ikindi bikorera ngo biteze imbere ugasanga  baradindiye kandi nta n’igisimbura uwo munsi babona, bakaba na bo bishimira kugira aho bahurira n’abaturage hazwi,imvura itagwa ngo bahave, hakazakorerwa n’ibindi nk’igikoni n’iziko ry’umudugudu,urugo mbonezamikurire rw’abana,umugoroba w’ababyeyi, n’ibindi bihuza abatuye umudugudu,bituma barushaho gufata ingamba zihamye zo kubateza imbere.

Kugeza ubu mu karere kose hamaze kuzura ibiro by’imidugudu 8 gusa mu midugudu  588 ikagize,umuyobozi wako wungirije ushinzwe imibereho myiza y’abaturage,Mukamana Claudette akavuga ko hakomeje ubukangurambaga  ngo n’ibisigaye byubakwe,kuko byagaragaye ko aho ibi biro bikorerwamo byatanze umusaruro ukomeye cyane muri serivisi n’ibindi biteza imbere abaturage bihakorerwa,n’inyandiko z’ikemurwa ry’ibibazo by’abaturage zikagira aho zibikwa hizewe,zitazabura ngo hahore hagarukwa ku bibazo byakemuwe kera.

Abayobozi batandukanye mu muganda, aho basizaga ahazubakirwa umuturage utishoboye

Izindi wakunda

Bwiza.com