bwiza.com
Ahabanza » Abakinnyi batanu ba Eritrea bageze muri Uganda baburirwa irengero
Amakuru Imikino

Abakinnyi batanu ba Eritrea bageze muri Uganda baburirwa irengero

Abakinnyi batanu b’ikipe y’igihugu ya Eritrea y’abatarengeje imyaka 20 bavuye muri hoteli bari bacumbitsemo muri Uganda ntibongera kuboneka.

Bamwe mu bakurikirana iyi kipe babwiye BBC ko aba bakinnyi bacitse ndetse ubu bakaba bari gusaba ubuhungiro muri Uganda.

Ikipe ya Eritrea yagiye muri Uganda mu mikino ya CECAFA y’abatarengeje imyaka 20 ubu igeze mu mikino ya nyuma.

Bwana Aimable Habimana umuyobozi ushinzwe iri rushanwa yabwiye ibinyamakuru muri Uganda ko aba bakinnyi koko babuze.

Avuga ko baburiye muri Speke Apartments aho bari bacumbitse.

Bwana Habimana yabwiye ikinyamakuru Monitor ati: “Ubu twashyize abashinzwe umutekano aho bacumbitse no hafi y’iyi kipe kugira ngo irushanwa rizarangire neza”.

Iyi kipe ya Eritrea yari yitwaye neza kuko ubu igeze muri kimwe cya kabiri cy’irangiza (demi-finale) aho ikina na Kenya uyu munsi kuwa gatatu.

Ntabwo ingaruka zo kubura kw’aba bakinnyi zizwi neza ku musaruro w’iyi kipe uyu munsi.

Umutoza ubu asigaranye abakinnyi 14, gusa yavuze ko abatorotse bari banarwaye.

Mu 2015 abakinnyi 10 b’ikipe y’igihugu nkuru ya Eritrea banze gusubira mu gihugu cyabo nyuma yo gukina umukino muri Botswana.

Mu 2013 abakinnyi icyenda (9) ba Eritrea n’umutoza wabo batorokeye muri Kenya

Imiryango iharanira uburenganzira bwa muntu ivuga ko urubyiruko ibihumbi amagana rwa Eritrea rwahunze kubera ibikorwa bibi rukorerwa birimo n’imirimo ya gisirikare y’itegeko.

Izindi wakunda

Bwiza.com