bwiza.com
Ahabanza » Nkombo: Barataka inzara, kurya kabiri ku munsi bisaba umugabo bigasiba undi
Amakuru Politiki

Nkombo: Barataka inzara, kurya kabiri ku munsi bisaba umugabo bigasiba undi

Bamwe mu baturage b’umurenge wa Nkombo mu Karere ka Rusizi, bavuga ko batakibuka uko kurya kabiri ku munsi bisa, ko abana babo kujya ku ishuri mu gitondo bagize icyo bafata ari nk’inzozi kubera uko ubuzima bwaho buteye binajyanye n’uko bagira uturima duto tutanacyera neza nka kera kubera  guhora baduhinga ntibagire n’igihe baturaza ngo twisubire, bagasaba Leta kuhitaho by’umwihariko ikahageza imishinga iha abaturage benshi akazi kabazamura mu iterambere.

Baganira na Bwiza.com, bavuze ko bashimira  perezida Kagame wabakuye mu icuraburindi abagezaho umuriro w’amashanyarazi ,bahabwa n’amashuri y’abana babo  bava mu bujiji, bahabwa n’ubwabo ubu butagikoreshwa,…. None ubu ngo baracyakeneye byinshi ngo ubuzima bwabo bugende neza.

Bavuga kandi ko iyo bikubitiyeho ibihe nk’ibi imirimo y’uburobyi mu  kivu iba ihagaze amezi 2 ngo isambaza n’amafi birusheho kororoka byo bihumira ku mirari kuko abaturage hafi ya bose bo kuri iki kirwa bacungira ku burobyi, iki gihe bakamera nk’aho nta cyo bafite bakora kandi baba bagomba kurya, bakavuga ko iyi mibereho mibi bafite ari yo itera abana babo kugwingira kuko no kugira ngo umubyeyi yonse atabonye icyo arya gihagije biba ingorabahizi.

Ruhinzo Josephine w’imyaka 60, wahavukiye, avuga ko uko imyaka yagiye ihita n’abaturage baho biyongera cyane ubutaka bwagiye bucagagurwamo iminani bagabagabana n’abana n’abuzukuru busigara ari buto cyane bwaranagundutse bigaragara,ku buryo uretse udusoya n’udushyimbo duke,nta kindi kihera, n’ishyamba ngo gutera igiti kikagira nibura metero 3 z’uburebure gitegereza nk’imyaka 10.

Avuga ko n’uburobyi bacungiragaho  ibiva mu kivu byagabanutse cyane kubera gutunga n’izindi mpande z’igihugu,kubona uwaguha akazi ko guhinga bikagorana kubera utwo dusambu duto,bakaba nta kindi bagira bakuraho ifaranga rigaragara,ari yo mpamvu ngo bahorana inzara idashira kurya kabiri ku munsi bigasaba umugabo bigasiba undi.

Ati’’ Mperuka kurya kabiri ku munsi ngishyingirwa hashize imyaka hafi 40. Nta cyo tucyeza cyatuma turya ngo duhage kuko n’utwo dusoya n’udushyimbo uwatwejeje aturya twonyine n’umuryango tugahita dushira, n’ubwinshi bwacu  n’ako gashitu k’agasambu bakakagabagabana ntubone n’uburyo ukaraza ngo kisubire no kugunduka k’ubutaka,byose bikadusonga, ari yo mpamvu usanga n’igihagararo cy’abana bacu kidahuye n’imyaka yabo kubera kubura icyo turya gihagije.’’

Yongeyeho ati’’ kuhaba  utagira umugabo byo ni urupfu mu rundi kuko nibe n’umufite ajya gukorera abandi mu kivu, udusambaza abonye umugore akaducuruza hakurya y’amazi bakagira uko babaho, ingo abana bava ku mashuri bakarya ku manywa ni mbarwa, abenshi usanga nyuma ya saa sita birirwa bayura ntibige neza, abana bato ababyeyi bakabasiga bakajya gushakisha mu mirenge yo hakurya y’amazi kubitaho bikagorana bagafatwa n’indwara ziterwa n’imirire mibi, tugasaba kurushaho kwitabwaho na ho ubundi ubuzima  si bwiza kubera kurya ntiduhage.’’

Mukandayisenga Sophie w’imyaka 23,Bwiza.com yasanze mu murima ahinga na we yagize ati’’ nk’ubu niriwe mpinga ariko ndibubwirirwe kuko nimpingura nta kintu nsanga mu rugo na mama wagiye guhingiririza ku Nkanka hakurya y’amazi udufaranga azana turareba niba twabona icyo turarira gusa, kandi nize ubudozi ariko kubera kubura ubushobozi bwo kugura imashini yo kudoda ntacyo byamariye.’’

Byose ngo bikubitiraho ko n’ikintu cyose kihagera gihenze kubera kurangurirwa hakurya y’amazi, nta soko bagira  n’utangiye gutera imbere agahita ahava kandi nta bahimukira bandi, kuba nta kindi kintu bagira bakuraho ifaranga uretse uburobyi na bwo ngo butagitanga umusaruro nka kera,bagasaba ko imishinga y’iterambere igera mu karere itakorera hafi ya kaburimbo gusa,yanabageraho ikabateza imbere.

Umuyobozi w’aka karere wangirije ushinzwe imibereho myiza y’abaturage, Nsigaye Emmanuel  avuga ko koko imirire y’aba baturage igoye kubera ubutaka bwaho buto bwanagundutse n’uburobyi bukaba butifashe neza kandi abarenga 90% byabo ari bwo bacungiragaho.

Avuga ko batangiye kuhatekereza by’umwihariko, bareba uko bahangana n’ibibazo cy’ubusharire bw’ubutaka, bongera n’ubworozi bw’amatungo magufi, n’ibindi batekereza ko byabakura mu mibereho ikiri hasi barimo ikurura ahanini n’imirire mibi igaragara mu bana baho.

Imyumbati bahinga ngo na yo igwingirira mu butaka kubera ububi bwabwo

Izindi wakunda

Bwiza.com