bwiza.com
Ahabanza » Umunyamakuru uzwiho kuvuga ko yaguye abantu gitumo yatawe muri yombi na Polisi
Amakuru Imyidagaduro

Umunyamakuru uzwiho kuvuga ko yaguye abantu gitumo yatawe muri yombi na Polisi

Umuvugizi wa Minisiteri y’umutekano mu Burundi, Pierre Nkurikiye yemeje amakuru avuga ko umuraperi Baraka  Olègue n’umunyamakuru wataraga inkuru za Youtube, Paceli Iradukunda  benshi muri iki gihugu bazi nk’uwakundaga gutungura abantu akavuga ko yabaguye gitumo, batawe muri yombi n’inzego z’umutekano.

Nkurikiye avuga ko aba uko ari babiri bafungiye muri kasho ya polisi i Bujumbura bashinjwa ibyaha byo kwamamaza ibihabanye n’umuco.

Yagize ati “Umwaka ushize Olègue yasohoye indirimbo yise ‘Toriyinoti’ amashusho yayo ngo akaba yari arimo abagore bambaye ubusa, uyu mwaka asohora indi ‘Délégué Général’ nayo imeze uko. Izi ndirimbo zihabanye n’umuco na kirazira biranga umuco w’Abarundi”.

Pacelli Iradukunda wakoze amashusho y’imwe muri izi ndirimbo, yasabye imbabazi, agasaba ko bafungurwa bakagenda bagaha n’abandi ubuhamya ku buryo batazongera gukora ibihabanye n’umuco.

Ati “Ntabwo twari tuzi ko dukora amakosa”. Baraka na we ati “Benshi mu nshuti zanjye bagiye bangira inama yo gukora iyi ndirimbo ‘Délégué Général’ kugira ngo namamare ariko ntabwo nari nzi ko nzahura n’izi ngaruka”.

Iradukunda we kandi anashinjwa kwinjira mu buzima bwite bw’abahanzi by’umwihariko ngo akaba anakora mu buryo butazwi.

Iradukunda akorera sheni ya Waka Light Tv, ngo ikaba ikunzwe cyane mu Burundi, ariko ngo ibyo yakoraga byo gutungurana byabangamiraga benshi.

Ikinyamakuru Iwacu gitangaza ko uyu musore agenda agatungura umuntu ari mu buriri rimwe na rimwe arimo no gusambana, abandi akabatungura bari mu bindi bitandukanye batiteguye,  benshi ngo bakaba batabikunda bitewe n’uko ngo ari ukwinjira mu buzima bwite bw’umuntu.

Aba uko ari babiri beretswe itangazamakuru, bikaba byanenzwe ko bitari bikwiye kwerekana abantu imbere ya camera nk’abanyabyaha mu gihe batari bahamwa n’ibyaha bashinjwa.

Aba basore nk’uko nabo basabye imbabazi ngo barekurwe batahe, benshi bagiye bazibasabira nyuma yo kugaragaza ko batari bazi ko ibyo bakora bihanwa n’amategeko.

 

Izindi wakunda

Bwiza.com