bwiza.com
Ahabanza » Rulindo: Gitifu yagurishije isambu y’umuryango none imyaka ibaye irindwi batarahinduza
Amakuru Featured

Rulindo: Gitifu yagurishije isambu y’umuryango none imyaka ibaye irindwi batarahinduza

Mwumvinezayimana Fiacre uyobora umurenge wa Base amaze imyaka irindwi agurishije isambu afatanyije n’umuryango none guhinduza ibyangombwa byayo byarananiranye. Uyu muyobozi yiteguye gusubiza amafaranga yahawe, ariko uwo baguze nawe yamubereye ibamba.

Iyi sambu ni iy’umuryango wa Mwumvaneza Gabriel ari we se wa Fiacre. Iri mu mudugudu wa Budaha, akagari ka Gasiza, mu murenge wa Bushoki. Gitifu Fiacre yayigurishije na Manirora Evariste bakunda kwita Kimaranzara. Ubugure bwabaye mu 2012, ubwo Fiacre yari Gitifu w’akagari ka Gasiza, mbere y’uko azamurwa mu ntera akagirwa umunyamabanga nshingwabikorwa w’umurenge wa Base mu karere ka Rulindo. Fiacre avuga ko yahagurishije amafaranga ibihumbi 800, ariko ubwishyu bwarangiye mu 2015. Magingo aya rero uwaguze ntarandikwaho isambu, inzira yo guhererekanya ubwo butaka yabaye ingorabahizi.

Iki kibazo bivugwa ko kizwi n’abayobozi banyuranye kuva ku kagari kugera ku karere. Cyongeye kugarukwaho mu nteko y’abaturage yaguye y’abaturage b’akagari ka Gasiza kuri uyu wa kabiri.

Imbere y’abaturage basaga ibihumbi bine bateraniye ku kibuga cy’umupira (bamwe bita kuri sitade), imbere y’abashyitsi banyuranye baturitse ku karere ka Rulindo, abaturutse I Kigali no mu karere ka Nyaruguru, Manirarora Evariste asabye ijambo. Ni mu kiganiro kandi kinyura inyumva nkumve, kuri Radio Ishingiro ikorera mu karere ka Gicumbi.

Manirora, n’impapuro z’ubugure afite mu ntoki, ati, “ nagiranye ikibazo na Mwumvinezayimana Fiacre akiyobora kano kagari, twaguze ubutaka ariko na n’ubu ntibarampa ibyangombwa byabwo. Narazengurutse hose, ngeze ku karere barambwira ngo nta wamutinyuka”.

Abateraniye aho baguye mu kantu, bibaza ukuntu umuyobozi uzi amategekom kandi ushinzwe abaturage ari we ubarenganya.

Mugabo Sakindi Jean Bosco ni umusaza ukuriye imiryango itari iya Leta mu karere ka Rulindo. Agira ati, “Gitifu Fiacre yabikoze abizi, agurisha ubutaka bw’umuryango kandi abavandimwe benshi bari mu mahanga, abandi bafungiye Jenoside, ihererekanya ry’ubutaka ntirishoboka”.

Hashakishijwe abasobanukiwe amategeko agenga ubutaka, hagoboka umushyitsi waturutse Nyaruguru, maze ati, “niba ubutaka bwari bwanditswe ku muryango, abawugize bagombaga kuba bahari mu gihe cyo kubugurisha, kandi bakaboneka mu gihe cyo kubuhererekanya. Niba harimo ababa hanze n’abafunzwe, iryo hererekanya ntirishoboka”.

Gitifu ashaka gusubiza amafaranga, umuturage akaba ibamba

Ari Gitifu Mwumvinezayimana Fiacre uvugwa mu kibazo, ari na Gitifu Nzeyimana Pierre Claver uyobora umurenge wa Bushoki, bombi bahuriza ku kuba iki kibazo cyarageze mu nzego nyinshi. Hose bagirwaga inama yo kumvikana, Mwumvinezayimana Fiacre akabyemera ariko Manirarora Evariste akinangira.

Fiacre ati, “aho mariye kubona ko guhererekanya buriya butaka bizagorana, nasabye Kimaranzara ko namusubiza amafaranga ye nkarenzaho ibihumbi 200 nkamuha miliyoni, arabyanga. Twajyanye kwa Visi Meya ushinzwe imibereho y’abaturage, tujyana kwa MAJ, tujyana no muri One Stop Centre batugira inama, zose Kimaranzara akazanga”.

Bamwe mu baturage bavugiraga mu matamatama bavuga ko ubwo butaka bwongeye agaciro, bakanavuga ko uyu Kimaranzara yaba yarubatsemo inzu. Nyamara ba Gitifu bombi bavuga ko ikirimo ari umusingi (fondation) gusa.

Kuri uyu wa kane, umunyamabanga nshingwabikorwa wa Bushoki yongeye guhuza abafitanye ikibazo. Inama yabereye ku kagari ka Gasiza, irimo Manirarora Evariste, Mwumvinezayimana Fiacre, Gitifu w’akagari ka Gasiza na CEDO (ushinzwe imibereho y’abaturage) ari nawe mwanditsi wayo.

Gitifu wa Bushoki avuga ko inama yarangiye saamoya z’ijoro, Kimaranzara yakomeje kubananiza. Gitifu Nzeyimana Pierre Claver ati, “imyanzuro yose twafataga twasangaga hari abandi bayifashe ariko Kimaranzara akananirana. Bajyanye kwa Visi Meya, bajyana kwa MAJ, bajyana kuri One Stop Centre; ibyo babagiriyemo inama byose Kimaranzara yarabyanze”.

Uyu muyobozi avuga ko Kimaranzara yahakanye ibyo gusubizwa amafaranga, nubwo Fiacre yemera kurenzaho ibihumbi Magana abiri.

Gitifu Nzeyiamana ati, “ubu igisigaye ni uko icyo One Stop Centre izemeza nicyo kizashyirwa mu bikorwa. Nakomeza kwinangira hazitabazwa abagenagaciro bemeze ayo Fiacre agomba kumusubiza”.

Iyi sambu ivugwa kandi ngo iri mu misozi ahagenewe guhinwa ku buryo agaciro kayo kataba kamaze kwikuba kabiri mu myaka irindwi, kandi Fiacre yiteguye kuba yayatanga.

Ikindi Gitifu Fiacre avuga ni uko uwo baguze Manirarora Evariste (Kimaranzara) niyemera kugumana ubutaka butamwanditseho azamusinyira. Ati, “niyemera kubutunga butamwanditseho azabinsinyira, ejo ntazapfa agatera hejuru umuryango wanjye. Ikindi azaba yiteguye kuzahangana n’abavandimwe banjye igihe bazabonekera”.

Izindi wakunda

1 Igitekerezo

HAKIZIMANA SULTAN 07/10/2019 10:32 am at 10:32 am

ICYO NAVUGA KURI IKI KIBAZO; MWUMVINEZAYIMANA FIACRE NAWE KURI UBWO BUTAKA AFITEHO. UWO KIMARANZARA AZAFATE AGACE KA FIACRE AHASIGAYE H’ABAVANDIMWE BA FIACRE; FIACRE ASUBIZE AMAFARANGA HIYONGEREYEHO INYUNGU. GUS AFIACRE YARAHEMUTSE.

Subiza

Tanga Igitekerezo

Bwiza.com