bwiza.com
Ahabanza » Salvado yasabye imbabazi ku rwenya yateye kuri Jenoside yakorewe Abatutsi
Amakuru

Salvado yasabye imbabazi ku rwenya yateye kuri Jenoside yakorewe Abatutsi

Umunyarwenya w’Umugande witwa Patrick Salvado Idringi uzwi nka Salvado yasabye imbabazi ku bw’urwenya yateye kuri Jenoside yakorewe Abatutsi mu 1994.

Ku wa 5 Mata 2019 ni bwo uyu munyarwenya ubwo yari mu gitaramo cy’umuhanzi Awilo Longomba wo muri Repubulika Iharanira Demukarasi ya Congo cyabereye muri Serena Hotel mu mugi wa Kampala muri Uganda. Yateye urwenya kuri aya mateka mabi u Rwanda rwanyuzemo, bifatwa nko gutokoza Abanyarwanda, guhakana no gupfobya jenoside ndetse no kwibasira u Rwanda.

Salvado yavuze ko hari amagambo abakozi ba RwandAir bakunda kuvuga harimo amahoro, amafaranga, amahanga, Paul Kagame, na jenoside.

Abanyarwanda bababajwe n’uru rwenya kandi rwafashwe nko gukomeretsa abagizweho ingaruka n’aya mateka, bashyize aya mashusho ku mbuga nkoranyambaga maze batangira kunenga Salvado mu butumwa butandukanye.

Salvado yabwiwe ko Jenoside yakorewe Abatutsi atari ingingo yo kuzana mu rwenya, bamusaba gusaba imbabazi Abanyarwanda ariko na we aranangira. Yigeze gusubiza ko bizabatwara igihe kinini bategereje ko asaba imbabazi.

Bamubwiye kandi ko Abanyarwanda batarakira ibikomere by’ibyabaye muri jenoside, bityo atakabaye yongera kubakomeretsa.

Salvado yatangaje kuri uyu wa 6 Ukwakira 2019 ko hari abamubwiye nabi ku bw’uru rwenya ari yo mpamvu avuga yatumye akomeza kwihagararaho.

Yongeraho ati: ” Murakoze ku bwo kunyegera. Ndasaba imbabazi ku bwo kubibutsa amateka mabi, ntabwo ari cyo nari ngamije.”

Jenoside yakorewe Abatutsi yabaye mu 1994, itwara ubuzima bw’abarenga miliyoni mu minsi 100.

 

 

Izindi wakunda

Bwiza.com