bwiza.com
Ahabanza » Ingabire Victoire yahaswe ibibazo ku gitero cy’i Musanze
Amakuru Politiki

Ingabire Victoire yahaswe ibibazo ku gitero cy’i Musanze

Urwego rw’igihugu rushinzwe ubugenzacyaha (RIB) rwahamagaje Ingabire Umuhoza Victoire, umuyobozi w’ishyaka FDU-Inkingi ritaremererwa gukorera mu Rwanda, kugira ngo abazwe ku kuba hari aho yaba ahuriye n’igitero cyagabwe mu karere ka Musanze mu mpera z’icyumweru gishize, kigahitana abantu 14, abandi 18 bagakomereka.

Umuvugizi wa RIB, Mbabazi Modeste yemereye Kigali Today dukesha iyi nkuru  ko Ingabire yahamagajwe n’uru rwego ngo abazwe kuri icyo gitero, ariko ntiyigeze (Mbabazi) atangaza byinshi kuri aya makuru.

Yagize ati “Ni byo yahamagajwe ngo abazwe ku bitero byabereye i Musanze, ariko ibyinshi kuri icyo kirego bifitwe n’umugenzacyaha ukurikirana iyo dosiye. Nta makuru arambuye ahari ubungubu”.

Amakuru aravuga ko bamwe mu bakorana na Ingabire baba bafite aho bahuriye n’igitero cyo mu ijoro rishyira tariki ya 05 Ukwakira 2019, cyagabwe ku baturage b’abasivile.

Polisi y’igihugu yavuze ko abagabye igitero bari bitwaje intwaro zirimo n’iza gakondo.

Polisi y’igihugu kandi, nyuma yatangaje ko 19 mu bagabye igitero baje kwicwa, naho abandi batanu barafatwa.

Nyuma y’iki gitero, Ingabire yaracyamaganye, asaba abakigabye “gusubiza inkota mu rwubati”, yungamo ati “ntimushobora gukunda igihugu igihe mwica abaturage bacyo.”

 

Izindi wakunda

Bwiza.com