bwiza.com
Ahabanza » Muhanga: Abaturage basanganwe Toni zisaga ebyiri z’amabuye y’agaciro mu gicuku
Amakuru

Muhanga: Abaturage basanganwe Toni zisaga ebyiri z’amabuye y’agaciro mu gicuku

Mu gicuku cyo kuri uyu wa 07 Ukwakira ahagana mu masaha ya saa sita z’ijoro Polisi ikorera mu karere ka Muhanga mu murenge wa Nyamabuye yafashe uwitwa  Nkundimana Eugene na Masabo Jean D’Amour bari mu modoka  yo mu bwoko bwa Jeep Land Cruiser RAB 232 S ipakiye amabuye y’agaciro ya magendu imifuka 39.

Aya mabuye akaba ari ayo mu bwoko bwa Gasegereti na Koluta akaba yaragiye aturuka mu makompanyi atandukanye y’ubucukuzi bw’amabuye y’agaciro mu turere dutandukanye nka Execok yo mukarere ka Karongi, Big mining yo mu karere ka Ruhango, TMT yo mu karere ka Rutsiro hakaba n’ayavuye mu karere ka Ngororero. Aya mabuye yose akaba yahurizwaga mu nzu y’uwitwa Kazuru iherereye mu isanteri ya Mata, akagari ka Tyazo mu murenge wa Muhanga akaba ari naho apakirirwa.

Umuvugizi wa Polisi mu Ntara y’Amajyepfo Chief Inspector of Police (CIP) Sylvestre Twajamahoro avuga ko kugira ngo iyi modoka ifatwe byaturutse ku makuru yatanzwe n’abaturage bavuze ko hari imodoka irigupakira ibintu muri icyo gicuku kandi bicyekwa ko bigeye kujyanwa mu mujyi wa Kigali.

Yagize ati: “Abapolisi bakorera mu karere ka Muhanga bakimara guhabwa ayo makuru bahise batega iyo modoka bayifatira mu kagari ka Remera, mu murenge wa Nyamabuye bayisatse basangamo ayo mabuye abari bayirimo babajije ibyangombwa byayo basanga ntabyo bafite. Nkundimana Eugene wari umushoferi ari kumwe na Masabo Jean D’Amour nibo bari bafite ayo mabuye y’agaciro.”

CIP Twajamahoro avuga ko iyo modoka bayisatse bakayisangamo imifuka 39 y’amabuye y’agaciro buri mufuka umwe upima ibiro 70 nk’uko byavuzwe na Masabo Jean D’Amour ari nawe ushinzwe kugenda apakira imodoka kuko ngo agenda avugana n’abafite ayo mabuye akabanyuraho akayapakira; Masabo akaba yavuze ko aya mabuye bari bayajyanye mu mujyi wa Kigali.

Yaba iyi modoka ndetse n’abari bayirimo n’ayo mabuye bashyikirijwe urwego rw’igihugu rw’ubugenzacyaha rukorera kuri sitasiyo ya Nyamabuye ngo bakurikiranwe ku cyaha bacyekwaho.

CIP Twajamahoro yakanguriye abaturage ko batagomba kwishora mu bikorwa by’ubucukuzi n’ubucuruzi bw’amabuye y’agaciro batabifitiye uburenganzira cyane ko baba bashyira ubuzima bwabo mu kaga  ndetse bakanahura n’igihombo.

Yagize ati: “Buri gihe Polisi y’u Rwanda ikangurira abantu ko ibikorwa byo gucukura no gucuruza amabuye y’agaciro utabifitiye uburenganzira bitemewe n’amategeko cyane ko ababikora birengagiza ingaruka ziterwa nabyo zirimo kwangiza ibidukikije bishobora guteza isuri cyangwa ubutayu ndetse bamwe mu bajya gucukura amabuye  rwihishwa bagwa mu birombe.”

Yakomeje yibutsa abaturage ko  nta muntu wemerewe gucuruza amabuye y’agaciro atabifitiye uburenganzira kuko bimuhombya ubwe bikanahombya n’igihugu kandi agacibwa n’amande.

Akomeza ashimira abaturage bagize uruhare rwo gutanga amakuru yatumye iyi modoka ifatwa, akanagira inama abakora ubucuruzi nk’ubu  kubireka kuko Polisi iri maso igihe cyose. Yanabibukije ko abitwikira ijoro bakajya gukora ibyaha bibeshya kuko k’ubufatanye n’abaturage nta gihe na kimwe Polisi y’u Rwanda itaba iri maso, ikindi kandi inzira zose n’amayeri yose bakoresha bitazigera bibahira.

Ingingo ya 54 mu itegeko no 58 ryo ku wa 13/08/2018 rigenga ubucukuzi bw’amabuye y’agaciro na kariyeri rivuga ko gukora ibikorwa by’ubucukuzi bw’amabuye y’agaciro cyangwa kariyeri nta ruhushya, umuntu wese ushakashaka, ucukura, utunganya, ucuruza amabuye y’agaciro cyangwa kariyeri nta ruhushya, aba akoze icyaha.

Iyo abihamijwe n’urukiko, ahanishwa igifungo kitari munsi y’amezi abiri (2) ariko kitarenze amezi atandatu (6) n’ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni eshanu (5.000.000 FRW) cyangwa kimwe gusa muri ibyo bihano. Urukiko rutegeka kandi ubunyagwe bw’amabuye y’agaciro cyangwa kariyeri byafatiriwe biri mu bubiko, bicuruzwa cyangwa bitunganywa nta ruhushya.

Izindi wakunda

Bwiza.com