bwiza.com
Ahabanza » Messi yahishuye ko yigeze gushaka kuva muri FC Barcelone abura ikipe imurambagiza
Amakuru Imikino

Messi yahishuye ko yigeze gushaka kuva muri FC Barcelone abura ikipe imurambagiza

BARCELONA, SPAIN - AUGUST 04: Lionel Messi of FC Barcelona waves to the crowd prior to the Joan Gamper trophy friendly match at Nou Camp on August 04, 2019 in Barcelona, Spain. (Photo by David Ramos/Getty Images)

Lionel Messi yavuze ko mu mwaka wa 2013 yashatse kuva muri Barcelone, ariko ubu akaba ashaka gusoreza umupira we muri iyi kipe.

Rutahizamu Messi w’imyaka 32 y’amavuko yabwiye radio RAC 1 ikorera i Barcelone ko “yumvaga afashwe nabi cyane” na Espanye muri icyo gihe ubwo we na se bakorwagaho iperereza ku buriganya mu gutanga imisoro.

Yagize ati: “Mu by’ukuri, icyo gihe, natekereje kugenda. Atari ukubera Barcelone ahubwo ari ukubera ko nashakaga kuva muri Espanye, ntabwo nashakaga kuguma hano ukundi”.

Yongeyeho ati: “Imiryango yanjye yari ifunguye ku makipe menshi ariko nta na rimwe nandikiwe n’ikipe insaba kuyikinira kuko buri wese yari abizi ko rwose nashakaga kuguma hano. Ibi byambayeho byarenze no ku marangamutima ngirira Barça”.

Ku myaka 13 y’amavuko, Messi nibwo yageze mu ishuri ry’umupira w’amaguru rya Barcelone rizwi ku izina rya ‘La Masia’, atangira gukina mu ikipe ya mbere ya Barcelone afite imyaka 16.

Yakomeje aba umukinnyi wesheje umuhigo wo gutsindira iyi kipe ibitego byinshi – ibitego 604 – akaba aza no ku mwanya wa kabiri mu bamaze gukina imikino myinshi kurusha abandi muri iyi kipe, inyuma ya Xavi bahoze bakinana.

Nubwo uyu rutahizamu ukomoka muri Argentine avuga ko nta “gishya na kimwe” cyo kongeraho kuri kontaro ye yo gukinira iyi kipe – kontaro afite ubu izarangira mu 2021, abona ahazaza he muri Barcelone.

Ati: “Igitekerezo cyanjye ni ukuguma hano imyaka myinshi. Ni uko namye ntekereza kandi nta kintu na kimwe cyahindutse. Biragaragara ko igitekerezo cyanjye ari ugusoreza muri Barça”.

“Cyane cyane kubera uko numva merewe mu ikipe no ku muryango wanjye. Turishimye cyane [hano] i Barcelone”.

 

Izindi wakunda

Bwiza.com