bwiza.com
Ahabanza » Nyamasheke/ Karambi: Abageze mu zabukuru 11 bahawe inzu zo kubamo- AMAFOTO
Amakuru Politiki

Nyamasheke/ Karambi: Abageze mu zabukuru 11 bahawe inzu zo kubamo- AMAFOTO

Kwizihiza umunsi mpuzamahanga w’abageze mu zabukuru ku rwego rw’akarere ka Nyamasheke byabereye mu murenge wa Karambi, aho abageze mu zabukuru 11 batagiraga aho kurambika umusaya bahawe inzu.

Abazihawe batangarije Bwiza.com ko  bumvaga nta mutekano usesuye bafite n’imibereho yabo itameze neza mu gihe batashoboraga kubona aho baba heza, bamwe ngo bakaba n’abana babo babonye babuze aho baba  bakabata bakigira gushakisha indi mibereho hirya no hino bataragarutse ngo barebe uko bameze kubera kubura aho babasanga, bakishimira ko ubuzima busharira bamazemo igihe abaturage bagenzi babo ku bufatanye n’ubuyobozi  babubakuyemo.

Kanyeshyamba Modeste yishimiye guhabwa inzu nyuma y’igihe kirekire asembera

Nyirashyirambere Pascasie avuga ko yapfushije umugabo asanzwe ari umugore wa 2 akamusigira abana 3 ntaho baba abasigiye, atangira kubasemberana mu baturanyi bamuteragirana,n’umuhaye agakoni abamo akakamukodesha kuri menshi kandi nta mbaraga zihagije agifite zo kumubonera aho aba n’icyo atungisha abo bana, babiri muri bo bamusiga aho bajya kwishakira indi mibereho ntibanagaruka kumureba kubera kubura aho bamusanga,akishimira ko abonye aho aba.

Ati’’ ndashimira cyane Leta yacu yita ku bageze mu zabukuru ikadushakira aho dusazira kuko nkanjye nabagaho mu bwihebe bukabije, n’abana barantaye bakigira gushakisha ubundi buryo babaho,bakanga no kugaruka kundeba kubera kubura aho bansanga, ariko ubwo mbonye aho mba ndizera ko na bo nzongera kubabona bagira aho bansanga hazima.’’

Kanyeshyamba Modeste ufite ubumuga bw’ibikomere byinshi yatewe n’abagizi ba nabi bari bagiye kumwica,avuga ko nyuma yo kumugazwa n’abo bagizi ba nabi nta kindi yari agishoboye kwimarira, n’umuryango we uramutererana atarurwa n’umugiraneza wamubanaga iwe, akishimira ko na we ahawe aho aba.

Ati’’ ni ibyishimo bikomeye cyane kuri jye kuko ubuyobozi bwiza dufite bumboneye aho mba, bakaba baduhaye n’ibiribwa n’ibindi bikoresho bidufasha gusunika iminsi, natwe izi nzu tuzazifata eza kuko tuzibonye twari mu bwihebe bukomeye cyane.’’

Nyirashyirambere Pascasie ahagaze imbere y’inzu yahawe

Bavuga icyakora ko nubwo babonye izi nzu,ibikoni byazo n’aho babasha kogera, basigaranye ibindi bibazo by’ingutu byo kuba nta mazi ari hafi y’aho batujwe mu kagari ka Rushyarara, ntaho bafite babasha guhinga ngo babeho neza, nta dutungo bafite borora, n’izi nzu nta mashanyarazi arimo kandi no kubona peteroli bashyira mu dukoroboyi ngo bacane ntibyaborohera,bagasaba no kwitabwaho kuri uru rwego.

Umunyamabanga nshingwabikorwa w’uyu murenge, Uwizeyimana Emmanuel, avuga ko bafite abageze mu zabukura babarirwa mu 1500, uretse aba 11 bari bababaje cyane kubera kutagira aho baba, hari abandi  bagera ku 120 baba mu nzu zishaje cyane zigereranywa na nyakatsi,ku bufatanye 17 muri zo ngo zimaze gusanwa, izindi na zo mu mezi make ari imbere zizaba ngo zarangije gusanwa, bakazabasha kubona aho baba, cyane cyane ko hari n’abahabwa inkunga y’ingoboka n’imirimo muri VUP bitewe n’imbaraga zabo, bagasabwa gufata neza duke babona ngo tubashe kubasindagiza neza.

Umuyobozi w’aka karere wungirije ushinzwe iterambere ry’ubukungu Ntaganira Josué Michel, avuga ko bibabaje kuba hari abageze mu zabukuru babaho nabi kandi barabyane n’abana babo bifashije, bigaterwa no guteshuka ku muco w’uko urukwavu rukuze rwonka abana, aho abasaba kwisubiraho, mu bukangurambaga  bakora mu baturage, bakaba banagiye kwibanda ku gukangurira abana kwita ku babyeyi ,umubyeyi akareka kubaho mu bwigunge kandi yarabyaye ,abe babayeho neza ,agakomeza kubera Leta umutwaro kandi abakamwitayeho bahari nta n’icyo babuze.

N’abaturanyi babo bishimiye ko babonye aho barambika umusaya
Abayobozi banyuranye bagenda bashyikiriza aba basaza inzu bagenewe
Abageze mu zabukuru bishimiye kungurana ibitekerezo n’abayobozi babo

Izindi wakunda

Bwiza.com