APR BBC yisubije igikombe cya shampiyona

Ikipe ya APR Basketball Club yisubije igikombe cya shampiyona, nyuma yo gutsinda Patriots BBC bari bahuriye mu mukino wa gatandatu wa kamarampaka amanota 73-70.

Ni umukino waraye ubereye muri BK Arena i Remera. APR yatwaye igikombe nyuma yo kugira intsinzi 4-2.

Patriots nk’uko imyinshi mu mikino yagiye iyihuza na APR yagiye igenda, yatangiye iyobora umukino mbere y’uko Ikipe y’ingabo z’igihugu iyigaranzura nyuma yo kubifashwamo n’abakinnyi nka Isaiah Miller, Shema Bruno, Chris Ruta, William Robenys, Nshobozwabyosenumukiza, Bush Wamukota, Ntore Habimana, Axel Mpoyo, Dan Manzi, Diarra Aliou Fadila na Shema Osborn.

Nyuma yo kwegukana igikombe, Kirenga Danny wahoze ari umutoza wa Basketball yavuze ko APR BBC itakiri ikipe yo ku rwego rw’amakipe y’imbere mu gihugu.

Ati: "Ikipe ya APR BBC bo barareba irushanwa rya BAL, umwaka ushize kuri yo wagenze nabi. Gusa uyu mwaka habayemo impinduka, nyuma yo kuzana umutoza mushya hari icyizere kuko azi kumenya umukinnyi ushoboye. Urebye uburyo yagiye asimbuza bikwereka ko ikipe ayizi. Mu byo bakwibandaho kugira ngo ikipe ya APR BBC izabashe kwitwara neza muri BAL bakwibanda mukugura abakinnyi, kuko abasimbura ntabo ifite. Yego umutoza arahari ariko babura umuntu muremure ushobora gukina agakinisha abandi".

Umunyamakuru Annet Mugabo wa VOA na we asanga APR ikeneye abakinnyi bunganira abo ifite.

Ati: "Ikintu cyakuyemo ikipe ya APR BBC muri Sahara Conference muri Senegal wabonaga ko ari ikipe idafite defence. Yari ikipe nziza ifite abasore nka Noel, Adonis, ariko nabo baramuka barushye batari mu kibuga ikipe igasubira inyuma cyane. Uyu munsi nibyiza bafite Miller , Diara, Nshobozwa... Bagomba kuzana abakinnyi benshi bunganira aba kuko BAL bisaba kuba ufite abakinnyi benshi bari kurwego rwiza."

APR BBC nyuma yo kwegukana igikombe yahembwe Frw 15,000,000; Patriots ya kabiri ihembwa Frw 7,500,000.

Ni mu gihe REG BBC ya gatatu yahembwe Frw 3,500,000.

Ni mu gihe umukinnyi witwaye neza kurusha abandi ari Miller wa APR wahembwe Frw 2,000,000.

APR Basketball yegukanaga igikombe cya shampiyona cya 15 mu mateka yayo, yahise ikatisha itike yo kuzahagararira u Rwanda mu mikino nyafurika ya Basketball Africa League.