Abasirikare b’u Burundi 5 mu baturuka mu birindiro bya Ruhagarika, baherutse kurasanira n’urubyiruko rw’Imbonerakure hafi y’uruzi rwa Rusizi, bafungiwe mu ntara ya Cibitoke iri mu majyaruguru y’uburengerazuba bw’iki gihugu.

Urubuga SOS Burundi rwatangaje ko amakuru rwahawe n’abo mu nzego z’umutekano avuga ko aba basirikare bafungiwe muri kasho ya Polisi yo ku rwego rw’intara ya Cibitoke guhera tariki ya 13 Nzeri 2023.

Gufungwa kw’aba basirikare barinda umutekano ku ruzi rwa Rusizi, nk’uko amakuru abivuga, kwaturutse ku kuba baragerageje guhagarika Imbonerakure zageragezaga kwambutsa inka 10, zizijyana muri Repubulika ya demukarasi ya Congo, hakabaho kurasana.

Hari umuturage wagize ati: “Imbonerakure zashakaga kwambutsa inka zibarirwa muri RDC, zizijyana muri RDC zinyuze mu ruzi rwa Rusizi. Abasirikare barinda ku ruzi bashatse kuzisubiza inyuma, habaho guhangana. Imbonerakure imwe yarakomeretse."

Uru rubuga ruvuga ko umusirikare umwe mu batawe muri yombi yatorotse kasho ya Polisi muri Cibitoke mu ijoro ryo ku wa 16 rishyira uwa 17 Nzeri 2023, kandi kugeza ubu ntaraboneka.

Umushinjacyaha ku rwego rw’intara ya Cibitoke yatangaje ko hatangiye iperereza kuri iki kibazo, ntiyagira icyo yongeraho.

Imbonerakure ziravugwaho gufasha abacuruzi kwambutsa ibicuruzwa mu buryo bwa magendu, babijyana cyangwa babivana mu Burundi, kandi ngo ziba zifite intwaro.

Izindi Nkuru Bijyanye

FDLR yose ntiyanesha batayo imwe ya RDF - Gen Nkubito

Itsinda ry’Abakongomani ryitwaje intwaro gakondo ryateye abanyarwanda ribacuza utwabo

Rubavu: Abamotari basabwe kuba ijisho ry’umutekano w’Igihugu