Intumwa yihariye y’Umunyamabanga Mukuru w’Umuryango w’Abibumbye muri Repubulika Iharanira Demokarasi ya Congo, Bintou Keita, yashinje M23 kwinjiza $300,000 iyakuye mu gucukura Colta mu Rubaya ho muri Teritwari ya Masisi.

Keita yabitangaje ku wa Mbere ubwo yagezaga ijambo ku kanama k’umutekano ka Loni.

Yavuze ko gushinga imizi kw’ubutegetsi bwa M23 muri teritwari za Masisi na Rutshuru "byatumye ishobora kugenzura byuzuye umusaruro wa coltan" yaho, mbere yo gushimangira ko imitwe yitwaje intwaro mu burasirazuba bwa RDC yahindutse "abikorera bitwaje intwaro".

Yagize ati: "Ubucuruzi buva mu gace ka Rubaya, bugereranywa ko butanga ibirenga 15% by’umusaruro wa tantalum ku isi, buha uwo mutwe witwaje intwaro (M23) $ abarirwa mu 300,000 (Frw miliyoni hafi 400) ku kwezi. Ibi birahangayikishije cyane kandi bigomba guhagarikwa."

M23 yafashe Rubaya mu mpera ya Mata uyu mwaka, nyuma y’imirwano ikaze n’ingabo za leta ya DR Congo. Aka gace gacukurwamo Colta ikoreshwa mu gukora ibikoresho bya electronique nka telefone zigezweho na mudasobwa.

Ntacyo M23 iravuga ku byaraye bivuzwe na Madamu Bintou Keita.

Uyu mutwe icyakora ubwo wigaruriraga Rubaya, Lt Col Willy Ngoma uvugira Igisirikare cyawo yavuze ko batahafashe bagambiriye inyungu nyinshi iva mu bucukuzi bwa coltan n’andi mabuye y’agaciro yaho.

Izindi Nkuru Bijyanye

Tshisekedi yaba yaranze guhura n’Intumwa Idasanzwe ya EU ku bwende?

Paris: Iperereza kuri Callixte Mbarushimana ryahagaze kubera kubura ibimenyetso

Rulindo: Meya yanze gushyira mu bikorwa umwanzuro umusaba gusubiza mu kazi Gitifu yirukanye