Ururimi ni igikoresho cyifashishwa mu itumanaho hagati y’umuntu n’undi.

Kumenya indimi z’amahanga byagufasha kumvikana n’umuntu uturuka mu gihugu kimwe n’ikindi.

Indimi zagufasha kugira inshuti zitandukanye nta mupaka.

Ururimi ni kimwe mu bituma habaho gufata imico y’abandi bantu cyangwa se ibindi bihugu. Twavuga ko ari igikoresho ndangamuco.

Rwifashishwa kandi mu bubanyi n’amahanga, aho usanga ibihugu bikoresha indimi runaka, bikongeraho n’iz’amahanga zikoreshwa cyane nk’Igifaransa n’Icyongereza.

Kugira ngo umenye kuvuga ururimi neza, urasabwa gukurikiza aya mambwiriza:

IBANDE CYANE MU GUSOMA

Kugira umuco wo gusoma ibitabo, inkuru ngufi n’inkuru ndende n’amakuru, byongerera umuntu amahirwe yo kunguka amagambo mashya no gufata mu mutwe.

GUHOZAHO

Niba wiyemeje kujya usoma bimwe mu byo nababwiye haruguru, birasaba ko ubikora buri munsi, mu gihe runaka wihaye. Niba warihaye gahunda yo kubikora iminota 30 cyangwa isaha; mu gitondo, ku manywa cyangwa nimugoroba; ni ngomba ko ubigira akamenyero. Aha wagerageza kumva n’ibiganiro cyangwa se amakuru avugwa mu rurimi ushaka kumenya ku maradiyo n’amateleviziyo.

IFASHISHE INKORANYAMAGAMBO CYANGWA POROGARAMU ZITANDUKANYE

Inkoranyamagambo(Dictionaire) ni igikoresha kiguha ubusobanuro bw’amagambo agera ku bihumbi. Mu gihe hari ijambo usobwe, ni byiza ko urebera ubusobanuro muri iki gitabo. Iki gitabo gishobora kugira ijambo rifite ubusobanuro busaga 40; ibi birasaba wowe nk’umusomyi kugira ubusesenguzi, ukareba ubusobanuro bufitanye isano n’ibyo usoma. Hari amaporogaramu akoreshwa muri telephone zacu zigezweho cyangwa se mudasobwa, yose adufasha kubona ubusobanuro no gukora imyitozo. Wifashishije izi porogaramu, ushobora kumenya niba uburyo usomye ijambo ari bwo, wakora imyitozo y’ikibonezamvugo, ukabona n’uko ijambo ryakoreshwa mu nteruro.

KWIGIRA KURI MURANDASI

Kuri murandasi(internet), hari imbuga zigisha ururimi zagufasha kwiga ururimi nka The Fluency Course rwigisha Icyongereza. Ku mbuga nk’izi, haba hari imyitozo yaba iyo mu nyandiko cyangwa mu magambo.

SHAKA UBURYO UVUGANA N’AB’URURIMI KAVUKIRE

Kuvugana n’abantu bavukiye mu rurimi byagufasha kumenya aho ubushobozi bwawe bugeze mu rurimi, ukaba wanakosora amakosa yawe mu mivugire.

REKA URURIMI RUBE KU NGENGABIHE YAWE Y’UMUNSI

Shyira umutima ku rurimi ushaka kumenya. Gerageza kumva umuziki, urebe amafilimi yakozwe muri urwo rurimi. Gerageza buri kimwe cyagufasha kumenya urwo rurimi.

IHUZE N’ITSINDA RYO KUGANIRIRAMO URURIMI

Ahanini biragoye cyane ko wamenya ururimi wenyine, nta muntu mugiye muganira. Gukora itsinda ry’abantu muhuje umugambi wo kumenya ururimi byagufasha kurumenya byihuse. Uzaharanire kuba uwa mbere utuma iryo tsinda rikoresha urwo rurimi. Niba mwakoze iri tsinda kandi, kiba kizira kuvugiramo urundi rurimi. Uko ikoranabuhanga rikomeje kuzamura uwego, hari uburyo bwinshi bwo gukora amatsinda, cyane wifashishije imbuga nkoranyambaga nka Facebook na WhatsApp.

AMAKOSA NTAKAGUCE INTEGE

Biragoye cyane kubona umuntu uvuga ururimi adakosa. Niba uyu munsi ukoze ikosa, ejo uzarikosora. Nubasha kumenya ko ukoze ikosa, ishimire ko ubimenye kuko ni yo nzira yo kwikosora. Wowe ongera imbaraga kandi nakwizeza ko byose bishobokera abashaka.

Izindi Nkuru Bijyanye

Kalima na Gahigi bahuriye mu isoko (uyu mwandiko ukwibutsa iki?

Abanzi 2 b’ingenzi u Rwanda rufite mu mboni za Gen. James Kabarebe

Bamwe mu barimu bakosoye ibizamini bya Leta bavuga ko batarishyurwa