Perezida wa Repubulika y�u Burundi akaba n�umugaba w�ikirenga w�ingabo z�iki gihugu, Evariste Ndayishimiye yahinduye umuyobozi mukuru w�urwego rw�igisirikare rushinzwe iperereza.
Nk�uko bigaragara mu itangazo ryashyizweho umukono n�Umukuru w�Igihugu, Minisitiri w�Intebe Alain-Guillaume Bunyoni na Minisitiri w�Ingabo, Alain Tribert Mutabazi tariki ya 22 Ukuboza 2021, iyi nshingano yari isanganwe Col. Ernest Musaba yahawe Brig. Gen. Silas Pacifique Nsaguye.
Icyemezo cy�umukuru w�igihugu cyatangiye gukurikizwa ubwo iri tangazo ryari rimaze gusohorwa n�ibiro bye kuri uyu wa Mbere, tariki ya 27 Ukuboza 2021.
Col. Musaba ari mu ntumwa Leta y’u Burundi yohereje ku mupaka uhuza iki gihugu n’u Rwanda, agirana ibiganiro na mugenzi we, Brig. Gen. Vincent Nyakarundi bigamije gusubiza mu buryo bwiza umubano w’ibi bihugu wahungabanye kuva mu 2015.
Inshuro zirenze imwe, Col. Musaba na Nyakarundi baganiriye ku buryo ibihugu byombi byakwifatanya mu gucunga umutekano wo ku mbibi, binyuze ahanini mu guhererekanya amakuru ava mu butasi.
Col. Musaba kandi ni we washyikirije u Rwanda abarwanyi 11 b’umutwe witwaje intwaro wa FLN bafashwe n’ingabo z’u Burundi zafatiye mu ishyamba rya Kibira, iki gikorwa kikaba cyarabaye mu Kwakira 2021.
Ni na we kandi Brig. Gen. Nyakarundi yashyikirije abarwanyi 19 ba RED Tabara ingabo z’u Rwanda zafatiye muri Pariki ya Nyungwe. Iki gikorwa cyabaye muri Nyakanga 2021.
Col. Musaba akuwe kuri iyi nshingano ibihugu byombi byemeza ko hari intambwe zishimishije zatewe kugira ngo umubano wongere ube neza, zirimo ahanini itangwa ry’aba barwanyi.
Tanga igitekerezo