Kuri konti ye X (yahoze ari Twitter), Umuvugizi w’Igisirikare cy’u Burundi (FDNB), Brig. Gen. Gaspard Baratuza, yatangaje ko igisirikare cyitegura kwerekana inyeshyamba za RED-Tabara.

Ku wa Kabiri, yanditse ati: “[…], FDNB izabagezaho ibihamya bizima by’Aba RED-Tabara bafashwe n’abandi bitanze ku ngabo zacu hasi.” Ibi byatangajwe nyuma y’itangazo ry’inyeshyamba ryashyizwe ahagaragara zivuga ko zateye igihombo kinini ingabo z’u Burundi zikanemeza ko mu basirikare zishe harimo umukoloneli.

Nk’uko iri tangazo ribivuga, “mu gitondo cyo ku itariki ya 25 Ugushyingo, nibura ba ofisiye 9, barimo na koloneli ushinzwe ikigo gishinzwe kuyobora ibikorwa, biciwe mu Murenge wa Mwenga mu Ntara ya Kivu y’Amajyepfo (mu burasirazuba bwa Congo).” Itangazo rigenewe abanyamakuru ryasinywe na Patrick Nahimana, Umuvugizi wa gisirikare wa RED-Tabara, ryongeraho ko hafashwe intwaro n’amasasu menshi muri iki gitero “kinini”.

Bivugwa ko nibura inyeshyamba 12 zo mu mutwe witwaje intwaro wa RED-Tabara ufite icyicaro mu Ntara ya Kivu y’Amajyepfo, bafungiwe muri Gereza Nkuru ya Bujumbura izwi ku izina rya Mpimba kuva mu byumweru hafi bibiri bishize.

Ku wa Gatanu, itariki ya 15 Ugushyingo, nibwo abo barwanyi 12 bo mu mutwe wa RED-Tabara bimuriwe muri Gereza Nkuru ya Bujumbura izwi ku izina rya Mpimba. Amakuru aturuka muri uyu mutwe witwaje intwaro yemeza ko “abarwanyi bacu bari bamaze umwaka umwe bafungiwe muri kasho ya Polisi ya Gisirikare (PM)”.

Polisi ya Gisirikare ifite icyicaro mu Mujyi wa Bujumbura.

Izindi Nkuru Bijyanye

Perezida Kagame yasabiye ibihano ibihugu bya EAC birimo RDC n’u Burundi

RDC yarunze inyeshyamba za FLN ya Rusesabagina hafi y’umupaka w’u Rwanda

Lubero: M23 yongeye gutana mu mitwe na FARDC