Umuhesha w’inkiko w’umwuga, Me Muhama François yaheze mu rungabangabo kubera abagenagaciro babiri badahuza ku gaciro bagenera ubutaka bumwe nk’uko byagenwe mu mwazuro w’urukiko rwisumbuye rwa Musanze wo kuwa 15/02/2023 mu rubanza N° RCA 00137/2021/TGI/MUS.
Ni urubanza rwabaye hagati y’abashakanye mu buryo bwemewe n’amategeko, ari bo: Mugabire Emmanuel Rubel n’umugore we Mukarugina Vestine ariko bikaba ngombwa ko batandukana imbere y’amategeko kubera impamvu zitandukanye zirimo no kuba umugabo yarashatse undi mugore witwa Mujawamariya Christine.
Mu myanzuro y’urubanza urukiko rwisumbuye rwa Musanze rwafashe, mu gika cyayo cya 34, rwemeje ko imikirize y’urubanza RCA 00293/2020/TB/GAK rwajuririwe ihindutse ku birebana n’igabana ry’imitungo ababuranyi bombi bagomba kugabana.
Icyo gika kigira kiti: "Urukiko rwemeje ko imikirize y’urubanza RCA 00293/2020/TB/GAK rwajuririwe ihindutse kubirebana n’igabana ry’imitungo ababuranyi bombi bagomba kugabana ku buryo bukutikira: Ubutaka bubaruye kuri UPI 4/02/01/02/3231 bufite 293 sqm; 4/02/01/02/1610 bufite 40sqm; 4/01/02/1521 bufite 814sqm ; 4/02/01/02/3229 bufite 12477sqm na 4/02/01/ 3253 bufite 547sqm bugomba kugabanywamo ibice bibiri bingana, buri wese agatwara igice kimwe. Icyakora kubirebana n’ubutaka bubaruye kuri 4/02/01/02/3229 bufite 12477sqm, mbere yuko ababuranyi babugabana hagomba kubanza kuvanwamo igice cya Ntawugashira Simon gifite 6% , hakanavanwamo igice cyubatsemo inzu Mukarugina Vestine yahererejwemo maze igice gisigaye, ababuranyi bombi bakakigabana ku buryo bungana."
Ni mu gihe mu gika cya 35 ari naho rugiganira ku bagenagaciro kigira kiti: "Rwemeje ko ubutaka bubaruye kuri UPI 4/02/01/02/3228 bufite 6740sqm na 4/02/01/02/3252 bufite 218sqm bwombi buhabwa agaciro maze Mugabire Emmanuel Rubel agasubiza Mukarugina Vestine 25% by’agaciro kabwo."
Igihe cyarageze maze umuhesha w’inkiko w’umwuga asaba umugenagaciro Ir. Nkurunziza Appolinaire kujya kubuha agaciro maze ubutaka bubaruye kuri 4/02/01/02/3228 bufite 6740sqm abugenera agaciro ka Miliyoni imwe, ibihumbi magana ane mirongo itatu na bine n’ijana na mirongo itandatu (1.434.160 frw) mu gihe ubutaka bubaruye kuri 4/02/01/02/3252 bufite 218sqm yabugeneye agaciro k’ibihumbi mirongo irindwi na kimwe na magana acyenda mirongo ine (71.940 frw), yose hamwe akaba miliyoni imwe n’ibihumbi magana atanu na bitandatu n’ijana na makunyabiri ( 1.506.120 frw).
Igenagaciro ryatewe utwatsi
Mukarugina Vestine yateye utwatsi iri genagaciro rya Ir. Nkurunziza maze umuhesha w’inkiko Muhama François amusaba kwishakira uwe, ari nabyo yakoze maze na we ashaka Ir James Ntihemuka amukorera igenagaciro mu buryo buhabanye kure n’ubwa mugenzi we Ir. Nkurunziza kuko uyu we yahaye uyu mutungo wose agaciro ka miliyoni cumi n’ibihumbi magana atatu na makumyabiri n’umunane na magana atandatu ( 10.328.600 frw) kuko ubuso bwa 6740 yabuhaye agaciro ko 10.040.000 frw mu gihe ubuso bwa 218 yabugeneye agaciro ka 288.600 frw.
Hirya y’ibi byose, abantu baribaza icyihishe inyuma y’aba bagenagaciro bize bimwe, bakoresha ibikoresho bimwe ku butaka bumwe ndetse no mu gihe kimwe ariko ntibahuze cyangwa ngo habemo ikinyuranyo gitoya bikabayobera.
Ni nde uvuga ukuri?
BWIZA yegereye bamwe mu baturage b’aho iyi mitungo iherereye mu mudugudu wa Rwinkuba, akagari ka Butereri mu murenge wa Busengo maze abenshi barimo na nyir’ubwite Mukarugina, bavuga ko nta hantu ubutaka burenga hegitari esheshatu [6740sqm harenga ha 6] hagurwa amafaranga miliyoni n’ibihumbi magana mu Rwanda, uko haba hameze kose.
Yagize ati: "Ni gute isambu isaga hegitari 6 yagurwa ubusabusa ngo ni uko ari mu cyaro!! Ndifuza ko urukiko rwangenera undi mugenagaciro cyane ko ari nanjye watsinze!! Sinishimiye agaciro kahawe isambu yanjye na Mugabire, ari na yo mpamvu nanjye nishakiye undi mugenagaciro kandi ni we wagerageje gushyira mu gaciro."
Mugabire Emmanuel we ku murongo wa telefone, yabwiye BWIZA ko ntacyo yarenza ku mwanzuro w’urukiko.
Uwitwa Bangamwabo Aloys yagize ati: "Umugenagaciro wa mbere yaraje noneho njyewe na Mugabire Emmanuel ndetse na Mukarugina Vestine tumuzengurutsa isambu kandi uwo mugabo yari afite GPS agenda apima, ageze ku muhanda awukuramo kuko wari usanzwe uhari mbere yo kubarura ubutaka. Yarakomeje apima n’indi sambu ariko agaciro yahaye ayo masambu yombi ntikaberanye na yo. Ntawamenya uko yabibaze."
Umukenyezi Honorine [Umukobwa wa Mukarugina Vestine ], we yagize ati "Umugenagaciro yaraje azenguruka isambu ari kumwe na Papa Emmanuel Mugabire ariko agaciro yahaye iyo sambu ya hegitari 6 zisaga, ntaho bihuriye."
Yakomeje agira ati: "Umugenagaciro apima isambu kubera ko Muhama yari yafashe icyemezo cyo kurangiza urubanza kuwa 08/05/202 , bityo natwe tumutega umutego twishyura umugenagaciro wacu make ngo adukorere akacu gaciro kuko twabonaga ko ako batanze, barimo kuduhengekera iruhande kandi bigaragara ko umuhesha w’inkiko Muhama abifitemo uruhare. Turifuza ko urukiko ubwarwo rwatugenera undi mugenagaciro wa gatatu akajya hagati ya bariya babiri cyangwa akemeza iby’umwe muri bo."
Abonye atanyuzwe, Mukarugina yandikiye umuyobozi w’urugaga rw’abahesha b’inkiko b’umwuga mu Rwanda ibaruwa yo ku wa 23/05/3023 imuvana mu rubanza kubera kutemeranya na we ku mirangirize y’urubanza kubera agaciro gake kahawe imitungo iburanwa.
Iyo baruwa igira iti: "Bwana muyobozi, mbandikiye iyi baruwa ngo mbasabe kuvana Muhama François mu rubanza rwanjye ashaka kurangiza rufite N° RCA 00137/2021/TGI/MUS rwaciwe kuwa 15/03/2023. Mu by’ukuri Bwana Muyobozi, ikinteye kubandikira iyi baruwa mbasaba ko mwakura umuhesha w’inkiko Muhama François mu rubanza rwanjye kuko nabonye akoresha inzira zihabanye n’amategeko mu kurangiza urubanza,
aho we aduha amatariki amenyesha umunsi wo kurangiza urubanza akoresheje telefoni ye igendanwa, tukirirwa tumutegereje tukamubura, twamuhamagara ntafate telefoni kandi ntadusobanurire impamvu yatumye ataza, n’aho agize ngo arayitabye akantuka anyita injiji. Ibi bikaba byaranteye impungenge ko kubera imyitwarire ye, nta butabera nahabwa nawe. No ku mugereka murahasanga ibaruwa nandikiye Muhama François imusaba kuva mu rubanza rwanjye yo kuwa 10/05/2023."
Avugana na BWIZA, Me Muhama François yavuze ko nubwo bavuga ko hakenewe undi mugenagaciro wa gatatu, we atazamutegereza.Yagize ati: "Nihabura undi mugenagaciro wa 3, njyewe nzajya kurangiza urubanza nshingiye ku genagaciro rya mbere [Rya rindi rya 1.506.120 frw] noneho abatazanyurwa, bazabindegere."
BWIZA izakomeza kubakurikiranira iby’aba bagenagaciro n’umuhesha w’inkiko w’umwuga n’uko urubanza ruzarangizwa cyangwa niba urukiko ruzagena undi mugenagaciro wa gatatu unyomoza ibyakozwe (Contre expertise).
Tanga igitekerezo