Iran yarashe ’imvura ya za missile’ kuri Israel

Igisirikare cya Iran ku mugoroba wo kuri uyu wa Kabiri tariki ya 1 Ukwakira, cyarashe amagana y’ibisasu byo mu bwoko bwa missile ziraswa kure kuri Israel.

Ni amakuru yemejwe n’Ibiro Ntaramakuru IRNA by’abanya-Iran.

Televiziyo y’Igihugu ya Iran na yo yanyujijweho itangazo ry’igisirikare ryemeza ko ibisasu bya missile “bibarirwa muri mirongo” byarashwe kuri Israel. Muri iryo tangazo Iran kandi yaburiye Israel ko hazabaho ikindi gitero nk’iki mu gihe haba habayeho kwihimura.

Igisirikare cya Iran kivuga ko igitero cyagabye kuri Israel ari cyo kwihimura ku rupfu rwa Ismail Haniyeh wahoze ayobora umutwe wa Hamas na Hassan Nasrallah wayoboraga uwa Hezbollah wo muri Lebanon bombi bivuganwe na Israel.

Iran ivuga ko igitero cyayo cyagambiriye "ibigo nyamukuru" ndetse ko amakuru arambuye kuri iki gitero ari butangwe nyuma.

Igisirikare cya Israel kibinyujije ku rubuga rwacyo rwa X cyemeje ko Iran yabarasheho "imvura ya za missile".

Itangazamakuru ryo muri iki gihugu riravuga ko missile zirenga 100 ari zo zarashwe.

Icyakora amakuru avuga ko zimwe muri izi missile zabashije kuraswa n’Ingabo za Israel na Leta Zunze Ubumwe za Amerika zitaragera ku butaka, by’umwihariko mu kirere cy’i Yeruzalemu.

Umuvugizi w’Igisirikare cya Israel, Daniel Hagari yatangarije kuri Televiziyo y’iki gihugu ko "nta makuru y’uwaba wishwe" n’iki gitero yigeze agaragara, ndetse ko "nta kindi kibazo mu kirere cyacu" igisirikare kibona.

Hagari yanasabye abaturage bari bagiye mu bwihisho ko bavamo.

Amakuru atangwa n’inzego z’ubutabazi za Israel icyakora yo avuga ko hari abantu babiri bakomerekeye byoroheje i Tel Aviv.

Israel yateguje ko igomba gufata icyemezo cy’igihe n’aho izasubiriza kuri kiriya gitero.