Minisiteri y’Ubuzima kuri uyu wa Gatanu yatangaje ko mu Rwanda hagaragaye abarwayi barwaye indwara y’umuriro mwinshi iterwa na virusi ya Marburg.

Iyi Minisiteri mu itangazo yasohoye yavuze ko hagikorwa iperereza rigamije kumenya inkomoko y’iyi ndwara, yungamo ko hashyizweho ingamba zo kuyirinda no kuyikumira mu bitaro no mu bigo nderabuzima bitandukanye.

MINISANTE yavuze ko "hatangiye igikorwa cyo kumenya abagiye bahura n’abagaragaweho n’iyi virusi, mu gihe abarwayi bakomeje kwitabwaho n’abaganga. Iyi ndwara ikwirakwizwa no gukora ku maraso n’amatembabuzi y’abantu bayirwaye. Ntabwo ikwirakwizwa binyuze mu mwuka.”

Mu bimenyetso biranga uwanduye virusi ya Marburg nk’uko Minisiteri y’Ubuzima yabitangaje, harimo kugira umuriro mwinshi, umutwe ukabije, kuruka, kuribwa mu mitsi, cyangwa kuribwa mu nda.

Iyi Minisiteri yasabye uwo ari we wese wabigaragaza guhamagara Ikigo cy’Igihugu Gishinzwe Ubuzima (RBC) kuri nimero 114 cyangwa akegera ivuriro rimwegereye.

Yunzemo ko ikomeje " gukurikiranira hafi iki kibazo kandi irakomeza kubagezaho amakuru ajyanye n’iyi ndwara. Abaturage barasabwa gukomeza imirimo yabo birinda kandi bakaza ingamba z’isuku.”

Minisante ntiyigeze itangaza umubare w’abanduye kiriya cyorezo, gusa yavuze ko ari bake bagaragaye muri bimwe mu bitaro byo mu gihugu.

Izindi Nkuru Bijyanye

Abantu bashya banduye Marburg mu Rwanda n’abayikize barangana

Ibimenyetso 10 byakwereka ko ushobora kuba utwite bitagusabye kwipimisha

Urukingo rwa Marburg ruratangira gutangwa,abaganga ku ikubitiro