Perezida George Weah yemeye ko yatsinzwe amatora

Perezida George Weah wa Liberia, yemeye ko yatsinzwe amatora y’Umukuru w’Igihugu yahatanagamo ashaka kuyobora iki gihugu muri manda ye ya kabiri.

Weah yemeye ko yatsinzwe, nyuma y’uko Komisiyo y’amatora itangaje by’agateganyo amajwi y’ibyavuye mu cyiciro cya kabiri cy’amatora yabaye ku wa Kabiri w’iki cyumweru.

Ni nyuma y’uko mu cyiciro cya mbere cyayo rwari rwabuze gica hagati ye n’umunyapolitiki Joseph Boakai wemejwe nka Perezida mushya wa Liberia mu myaka itandatu iri imbere.

Amajwi yatangajwe na Komisiyo y’amatora yerekana ko Boakai w’imyaka 78 yatsinze ku majwi 50.9%; ibisobanura ko yigaranzuye George Weah wari waramutsinze mu matora yo muri 2017 kuko we yagize amajwi 49.1%.

Weah watsinze amatora aheruka ku majwi 62%, yatsinzwe ayo muri uyu mwaka nyuma y’uko abenshi mu banya-Liberia bakunze kumunenga kutagira icyo afasha icyo gihugu mu bijyanye no guhashya ibibazo bibugarije nk’ubukene, ubushomeri, kutihaza mu biribwa ndetse n’umuriro muke w’amashanyarazi.

Ni mu gihe ubwo yiyamamazaga yari yarabahaye iryo sezerano.

Uyu mugabo mu ijambo yaraye avugiye kuri Radiyo y’Igihugu, yemeye ko yatsinzwe na mukeba we, anasaba abamushyigikiye gutera ikirenge mu cye na bo bakakira gutsindwa.

Ati: "Mu mwanya washize, navuganye na Perezida watowe Joseph Boakai mu rwego rwo kumushimira ku bw’intsinzi ye. Ndabasaba gukurikiza urugero rwanjye mukemera ibyavuye mu matora."

Kuba George Weah yemeye ko yatsinzwe bisobanuye ko Liberia igiye kugira bwa kabiri ihererekanya ry’ubutegetsi riciye muri Demokarasi mu myaka irenga 70 ishize. Irya mbere ryabayeho ni iryo mu myaka itandatu ishize ubwo Weah yajyaga ku butegetsi.

Joseph Boakai nyuma yo gutsinda ariya matora yabwiye Ibiro Ntaramakuru Reuters ko afite akazi kenshi kamutegereje, mbere yo gutanga ubutumwa bw’amahoro n’ubwiyunge ku banya-Liberia.

Liberia igiye kugira ihererekanya ry’ubutegetsi riciye muri demukarasi, mu gihe igice cya Afurika y’Uburengerazuba iherereyemo mu myaka itatu ishize cyakunze kurangwamo za Coup d’Ã©tat za hato na hato.

Iki gihugu kuri ubu kiracyarwana no kwigobotora ingaruka zatewe n’intambara ebyiri za gisivile zakibayemo hagati ya 1989 na 2003 zikagwamo abarenga 250,000.

Hejuru y’izi ntambara kandi haza n’icyorezo cya Ebola cyibasiye iki gihugu muri 2016 kigahitana ababarirwa mu bihumbi.