Umukuru w’igihugu cya Leta zunze ubumwe z’Amerika, Joe Biden ku wa gatatu w’iki cyumweru biravugwa ko yaba yarasanzwemo icyorezo cya Covid-19 bikaba byaranatumye atagaragara aho yagombaga gukomereza ibikorwa bye kwiyamamaza.

Amakuru dukesha igitangazamakuru CNN avuga ko byari byitezwe ko Biden aza kuganira n’abo mu mujyi wa Las Vegas ku mugoroba wo ku wa gatatu tariki 17 Nyakanga 2024, gusa ariko byaje kurangira bamutegereje igihe kinini atarahagera ari yo mpamvu hibajijwe icyo yabaye.

Janet Murguía umuyobozi mukuru wa UnidosUS yabwiye abari bitabiriye inama ko yaganiriye na perezida Biden akamubwira akababaro afite ko kuba atabashije kwitabira. Janet yagize ati "Perezida ’Biden’ murabizi mwese ko yitabiriye ibirori byinshi, kuri ubu yasanzwemo Covid-19."

Ibiro bikuru by’umukuru w’igihugu cya Leta Zunze Ubumwe z’Amerika byatangaje ko Biden yari afite ibimenyetso byoroheje by’iyi ndwara ya Covid-19 bitangazwa ko bamusanzemo. Byongeyeho n’umuganga we yemeje ko perezida Biden yamaze guhabwa doze ya mbere y’umuti uhangana na za virusi uzwi nka Paxlovid.

Biden yagize ati "Ndumva meze neza", yabivuze ubwo yari yerekeje aho atuye. Biteganyijwe ko agomba kwishyira mu kato nk’uko amabwiriza y’ikigo gishinzwe kurwanya indwara abigena.

CNN yatangarijwe n’ibiro bya White House ko na mbere hose Biden yarwaye Covid-19, ariko yabinyuzemo neza akoresheje cyane amavidewo akabasha kuganira n’abantu, mu minsi iri imbere ni nako bishobora kugenda. Nta kabuza gahunda ye yo kwiyamamaza irakomeza mu buryo budasanzwe.

Izindi Nkuru Bijyanye

Ba Jenerali 2 ba UPDF bishwe n’impanuka

Hamenyekanye ibyo FDLR na FLN bamaze iminsi baganira n’Igisirikare cya Ndayishimiye

Perezida Azali Assoumani yarusimbutse