Perezida Ruto yishongoye kuri Uhuru Kenyatta

Perezida wa Kenya, William Ruto yishongoye kuri Uhuru Kenyatta wahoze amukuriye mu kazi ko kuyobora iki gihugu, asubiramo uko yatsinze umunyapolitiki Raila Odinga utavuga rumwe n’ubutegetsi.

Ibi Ruto yabivugiye mu muhango wo gusengera igihugu kuri uyu wa 7 Gicurasi 2023, avuga ukuntu bitangaje kuba yari Visi Perezida ariko kandi agahinduka utavuga rumwe n’ishyaka rya Uhuru kandi yari aribereye umunyamuryango.

Yakomeje yishongora kuri Uhuru, avuga ukuntu yamwigaranzuye ubugira kabiri, aho yari asanzwe amwungirije ku mwanya w’Umukuru w’Igihugu bikarangira batumvikanye,ariko kandi ntibikureho ko ubu ameza yihindukije, ubu nawe akaba ari umukuru w’igihugu uri no mu rindi shyaka ritandukanye n’iryo yari asangiye na Uhuru akimwungirije.

Ikindi kandi ngo ni ugutsinda Raila Odinga wari ushigikiwe cyane na Uhuru. Ati: “Nkomeje gusaba imbabazi no gukomeza kwihanganisha inshuti yanjye yahoze ari Perezida. Ni ibintu bisanzwe kuba uyu munsi uri mu ishyaka riyoboye igihugu, ejo ukisanga mu ishyaka ritavuga rumwe n’ubutegetsi, uwari wungirije mu ishyaka riyoboye agahinduka umukandika mu ishyaka rihanganye mu matora, gusa nanone uyu ni wo mwihariko wa Kenya.”

Ruto yakomeje ati: “Wemeye guhuza ibiganza n’umwanzi wawe w’igihe kirekire kugira ngo undwanye ariko n’ubundi byarangiye mbatsinze. Natsinze Raila Odinga mu matora ku mugaragaro,ubwo nawe naragutsinze. Ni ukuri ukomeze wihangane kandi umbabarire.”

Yongeyeho ati: “Ishyaka ritavuga rumwe n’ubutegetsi ritsinda amatora, noneho Perediza wari uyoboye agakorana ihererekanyabubasha n’uwari umwungirije, rya shyaka ryari riri ku butegetsi rigahinduka iritavuga rumwe n’ubutegetsi. Uyu wo ni umwihariko wa Kenya gusa!”

Iri sengesho ryitwa National Prayer Breakfast rirasanzwe muri Kenya, kuri iyi nshuro rikaba ryari rifite insanganyamatsiko y’ubwiyunge bw’Abanyakenya.

Izindi Nkuru Bijyanye

Kenya: Umunyapolitiki ukomeye yibasiwe nyuma yo gusaba Perezida Kagame ko yarekera kuyobora u Rwanda