Rayon Sports yarahiriye gukura amanota atatu kuri Gasogi United bazahura mu mpera z’iki cyumweru, hanyuma iyo ntsinzi ikayitura Captain (Rtd) Uwayezu Jean Fidèle wahoze ari Perezida wayo urwaye.

Ku wa Gatandatu tariki ya 21 Nzeri ni bwo Gasogi izakira Rayon Sports, mu mukino w’umunsi wa kane wa shampiyona uzabera kuri Stade Amahoro i Remera.

Ni wo mukino wa mbere Murera izaba ikinnye kuva Uwayezu wahoze ari Perezida wayo yeguye ku nshingano zo kuyiyobora "kubera impamvu y’uburwayi".

Kapiteni w’iyi kipe, Muhire Kevin yaraye atangaje ko we na bagenzi be biteguye "gukotana", kugira ngo bazabone intsinzi yo gutura Jean Fidèle.

Yagize ati: "Perezida yaragiye kubera uburwayi, turamwifuriza gukira vuba. Gusa [kuba yaragiye] ntibivuze ko ikipe yasenyutse. Abasigaye tugiye gukotana kugira ngo umukino wa Gasogi United tuwutsinde tuwumuture".

Kevin Muhire kandi yavuze ko nk’abakinnyi ba Rayon Sports bifuza gukoresha uriya mukino mu rwego rwo kwiyunga n’abakunzi n’iyi kipe.

Kugeza ubu Rayon Sports ifite amanota abiri mu mikino ibiri ya shampiyona yombi yaguyemo miswi n’amakipe ya Marines FC ndetse n’Amagaju FC.

Iyi kipe icyakora iracyafite ikirarane cy’umunsi wa gatatu wa shampiyona izakiramo APR FC mu kwezi gutaha.

Gasogi United izaba yasuye kugeza ubu ni yo iyoboye shampiyona by’agateganyo n’amanota arindwi, mu mikino itatu ya shampiyona imaze gukina ikaba yaratsinzemo ibiri undi umwe irawunganya.

Izindi Nkuru Bijyanye

Abakinnyi ba Nigeria banze gukina na Libya nyuma yo guhura n’uruva gusenya

Kylian Mbappé aravugwaho gufata ku ngufu

Capitaine Traoré yavuze imyato les Etalons nyuma yo kwisengerera u Burundi