Abashinzwe ibikorwa byo kwamamaza Donald Trump bavuze ku wa Gatandatu ko rimwe mu itumanaho ry’imbere ryabo ryinjiriwe kandi bashinja Guverinoma ya Iran kubiba inyuma bakomeza ku bwumvikane bucye hagati ya Trump na Iran mu bihe byashize badatanze ibimenyetso bifatika.

Itangazo ry’abashinzwe kwamamaza uyu mukandida w’Abarepubulikani rije nyuma gato y’aho urubuga rw’amakuru Politico ruvuze ko rwatangiye kwakira email muri Nyakanga ziturutse ahantu hatazwi haruha inyandiko z’umwimerere za gahunda zo kwiyamamaza za Trump, harimo na raporo ivuga ku ntege nke zishoboka z’uwo biyamamazanya, JD Vance.

Mu itangazo rye umuvugizi w’iyamamaza rya Trump, Steven Cheung, yagize ati: "Izi nyandiko zabonetse mu buryo butemewe zisanzwe n’amasoko y’amahanga yanga Amerika, agamije kwivanga mu matora yo mu 2024 no kubiba akaduruvayo mu nzira yacu ya demokarasi."

Ku wa Gatandatu, Trump yanditse ku rubuga rwe nkoranyambaga, Truth Social, ko Microsoft (MSFT.O), yari imaze kumenyesha abashinzwe kumwamamaza ko Iran yinjiriye rumwe mu mbuga zabo.

Yavumye Iran, yongeraho ko "bashoboye gusa kubona amakuru asanzwe ku mugaragaro." Ntabwo yigeze asobanura byinshi kuri uku kwinjirirwa.

Reuters ivuga ko itashoboye kugenzura mu bwisanzure umwirondoro w’abakekwaho kuba aba hackers cyangwa intego zabo.

Abamamaza Trump bashingiye kuri raporo yo ku wa Gatanu y’abashakashatsi ba Microsoft yavuze ko Aba-hackers bafitanye isano na Guverinoma ya Iran bagerageje kwinjira kuri konti y’umuyobozi wo mu rwego rwo hejuru mu biyamamariza umwanya wa Perezida wa Amerika muri Kamena.

Raporo ivuga ko Aba-hackers bari bashimuse konti y’uwahoze ari umujyanama mu bya politiki hanyuma batangira kuyikoresha bibasira umuyobozi. Iyo raporo ntabwo yatanze ibisobanuro birambuye ku biranga uwibasiwe.

Izindi Nkuru Bijyanye

Centrafrique: Ishyamba si ryeru hagati y’abacanshuro ba Wagner n’Abanyarwanda

Ndayishimiye na ba Jenerali be baba bari mu myiteguro idasanzwe y’intambara

IRMCT yahaye umugisha icyifuzo cya RDC cyo kwakira Zigiranyirazo na bagenzi be