Mu Itangazamakuru rya hano mu Rwanda hiriwe inkuru ivuga ko Gasana Fidèle wahoze akorera ubutumwa muri iriya Diyosezi yasezeranye mu mategeko, nyuma y’ibyumweru bibiri yari amaze asezeye ubusesaridoti. Yasezeraniye ku biro by’Umurenge wa Kanombe mu karere ka Kicukiro, ku wa gatatu tariki ya 19 Kanama.

Amakuru avuga ko Padiri Gasana ari umupadiri wa kane wo muri Diyosezi ya Butare usezeye umurimo w’ubusasaridoti mu myaka irindwi ishize agahita arongora.

Mu kiganiro BWIZA TV yagiranye n’umwe mu bapadiri bahoze bakorera umurimo w’ubusesaridoti muri Cathédral ya Butare nyuma akaza gusezera, yashyize mu majwi Musenyeri Philippe Rukamba w’iriya Diyosezi kuba intandaro yo kuba abapadiri bakomeje kwiyambura ibishura ku bwinshi.

Uyu musesaridoti wakoreye umurimo muri Diyosezi ya Butare imyaka irenga 10, yasobanuye ko iriya Diyosezi igishingwa mu mwaka wa 1962 (yitwaga Astrida), Musenyeri wayo icyo gihe witwaga Yohani Batisita Gahamanyi ngo yakundaga abapadiri, ku buryo yabibonagamo na bo bakamwibonamo.

Impamvu ngo ni uko yabitagaho kuva bakiri abafaratiri, akamenya imiryango yabo ndetse akanamenya buri umwe icyo ashoboye, ku buryo n’uwabaga afite intege nke yageragezaga kumuremamo icyizere.

Cyakora cyo ngo aho Musenyeri Rukamba wamusimbuye aho aziye, ibintu ni bwo byatangiye kuzamba, akemeza ko kuba abapadiri bakomeje gusezera bishingiye ku buryo bw’imibereho y’uriya mushumba.

Uyu mupadiri yagize ati: "Mbona ko igitera kuba abapadiri benshi bakomeje kugenda bacika intege, gishobora kuba gishingiye kuri personnalité (uburyo bw’imibereho) ya Musenyeri Rukamba butandukanye n’ubwa Musenyeri Gahamanyi."

Uriya mupadiri wanze ko amazina ye atangazwa yavuze ko mu gihe cya Musenyeri Gahamanyi abapadiri bitabwagaho ntibagire ikintu na kimwe babura, bikajyana n’uko nta waburaga amafaranga yo kwiyitaho abapadiri bahabwa buri kwezi (inténtion de mèsse), ibitandukanye no kuba muri iki gihe bamara n’amezi atatu cyangwa ane badahabwa ayo mafaranga kandi bakeneye kubaho.

Kurikira ikiganiro cyose na Padiri

Padiri yanagarutse ku kuba mu gihe cya Musenyeri Gahamanyi abapadiri baroroherezwaga gukora ingendo, gusa muri iki gihe bakaba bakora urujya n’uruza bibagoye, ibituma bakora ubutumwa batishimye.

Ku ngingo ijyanye n’itonesha ndetse n’icyenewabo, uwahoze ari umupadiri yasobanuye ko Diyosezi ya Butare ikiyoborwa na Musenyeri Gahamanyi abapadiri bahabwaga amahirwe yo kujya kwiga, gusa kuri ubu abayahabwa bakaba ari abaswa kurusha abandi.

Ati: " Musenyeri Gahamanyi yakoraga uko ashoboye abapadiri bakajya kwiga, yitaye cyane ku bushobozi bafite. Niba umuntu mu iseminari ya Nyakibanda yaragaragaje ubushobozi muri domaine iyi n’iyi, Musenyeri Gahamanyi yamwoherezaga kwiga, akiga ibyo afitemo ububasha n’ubushobozi."

Yakomeje agira ati: "Mu gihe cya Musenyeri Rukamba, usanga abantu b’abaswa bajya kwiga abari abahanga ntibajyeyo, ukibaza niba icyo ari ikimenyane cyangwa ari igikundiro kiba kiri muri ibyo ngibyo, hanyuma bikaba byaca intege bamwe na bamwe muri ba bandi bakiri abapadiri."

Mu gihe amakuru avuga ko mu myaka irindwi ishize muri Diyosezi ya Butare hamaze gusezera abapadiri bane, umupadiri waganiriye na BWIZA TV yavuze ko iyo mibare irenga, ngo kuko abamenyekana cyane ari abo kuri Diyosezi (Diosesains), byongeye nawe nta muntu wari uziko yasezeye ndetse ko nabo mu yindi miryango bo batavugwa kandi nyamara nabo biyambura ibishura.

Yavuze ko abapadiri bo mu miryango ya édition Gatolika iyo basezeye nta wubimenya, agahuza isezera ryabo n’imibereho mibi ndetse n’urwango ruba muri bamwe muri bagenzi babo.

Hari umupadiri atatangaje amazina wavuye muri Repubulika Iharanira Demokarasi ya Congo aje gukorera ubutumwa muri Diyosezi ya Butare, gusa aza kuhavanwa n’ishyari yagiriwe na bagenzi be bigeze kumuraza hanze bamuziza urukundo yagaragarijwe n’abakristu.

Avuga iby’uwo mupadiri yagize ati: "Bamuraje hanze incuro ebyiri kugeza ubwo agiye kuri Polisi gusaba ko Polisi imufasha, Komanda wa Polisi abwira abapolisi ati nimwakire uyu muntu yabuze umutekano baranga, banze ni bwo yafashe icyemezo cyo kwisubirira iwabo muri Congo. Gusubira muri Congo yabuze amafaranga yo kumujyanayo, ayasaba abapadiri babana barayamwima, bagomba guterefona Ambasaderi wa Congo mu Rwanda ngo amuvuganire, ba bapadiri babana baravuga bati ntayo tumuha."

Icyo gihe ngo Musenyeri ni we wahaye uwo mupadiri itike imugeza iwabo ya 30,000Rwf na 20,000Rwf yo kwifashisha mu nzira.

BWIZA yagerageje kuvugana na Musenyeri Rukamba ngo imenye impamvu abapadiri bo muri Diyosezi ayoboye bakomeje gusezera, gusa ntibyakunda ko dushobora kuvugana.

Cyakora cyo muri Gicurasi uyu mwaka ubwo Padiri Rebero Jean Damascène wari Umujyanama we yasezeraga, Musenyeri Rukamba yabwiye IGIHE ko kuva mu gipadiri bigereranywa no kuba abashakanye batandukanye, ati :“ni nk’uko umukobwa yifuza kubana n’umuhungu, bagashakana, hanyuma buhoro buhoro, bikagenda bimurushya”.

Kuba abapadiri bakomeje gusezera ku bwinshi yabihuje no kuba “ibihe byahindutse kuko abantu banyuze mu ngorane nyinshi ku buryo hari aho bigera kubyakira bikamugora”.