Ubukungu bw’u Rwanda bwazamutseho 10,6% mu gihembwe cya mbere cya 2018 - NISR

Mu gihembwe cya mbere cya 2018 ubukungu bw’u Rwanda bwazamutseho 10,6% bitewe n’ubwiyongere bw’umusaruro w’ubuhinzi, serivisi ndetse no kwiyongera kw’inganda nk’uko byemezwa n’Ikigo cy’Igihugu cy’Ibarurishamibare (NISR).

Kuzamuka kw’ubukungu kwatewe no gukora neza mu rwego rw’ubuhinzi rwatanze 8%, urwego rw’inganda rwatanze 7%, n’urwego rwa serivisi rwatanze 12% nk’uko byemezwa n’imibare y’Ikigo cy’Igihugu cy’Ibarurishamibare yashyizwe ahagaragara kuri uyu wa Mbere.

Umuyobozi Mukuru wa NISR, Yusuf Murangwa, yatangaje ko ubukungu bw’u Rwanda mu gihembwe cya mbere cya 2018 bwari bwifashe neza, asobanura ko biteze ko buzakomeza kuzamuka mu mwaka wose wa 2018 by’umwihariko bitewe n’umusaruro w’ubuhinzi woherezwa hanze nk’ikawa, icyayi, ndetse n’amabuye y’agaciro, serivisi, ubwubatsi n’inganda.

Nk’uko byemezwa na NISR, ngo urwego rw’inganda rwariyongereye kubera kwiyongera kw’imyubakire yazamutseho 8%.

Ibintu bikorerwa mu Rwanda nabyo ngo byariyongereye nk’imyenda n’ibikomoka ku mpu byazamutseho 24% nk’uko byemezwa na NISR.

Naho imikorere iri hasi ngo yagaragaye mu bijyanye no gukora ibinyobwa n’itabi aho ngo umusaruro wabyo wagabanutseho 2% nk’uko imibare yagaragajwe ibigaragaza.

Kuzamuka k’ubukungu kuri uru rugero ni ukwa kabiri kwikurukiranyije nyuma yo kuzamuka ku rugero rwa 10,5% mu gihembwe cya kane cya 2017 nk’uko byemezwa na minisitiri w’imari n’igenamigambi, Uzziel Ndagijimana.

Minisitiri Uzziel Ndagijimana akaba yemeza ko ubukungu bw’u Rwanda bukomeje gukomera kandi hitezwe umusaruro mwiza muri uyu mwaka wa 2018.