Amateka n’udushya twagaragaye mu mikino y’igikombe cy’Isi

0 1,138

Imikino cy’igikombe cy’Isi cy’umwaka wa 2018 irakozwaho imitwe y’intoki, kuko kizatangira ku wa kane, tariki ya 14 Kamena 2018 mu Burusiya. Gifite amateka y’abantu n’ahantu ndetse n’ibintu, kikaba cyararanzwe n’udushya twinshi kuva mu 1930 gikinirwa bwa mbere, ubu kigiye gukinirwa ku ncuro ya 21.

1.Ishyirahamwe ry’Umupira w’Amaguru FIFA ryashinzwe n’umunyamakuru

Uwo ni umufaransa Robert Robert Guérin mu 1904. Ryatangiranye ibihugu binyamuryango 7, mu nama ya mbere bemeje ko igikombe cy’Isi kizabera mu Busuwisi ariko Abongereza baza kubyanga.

Umukino wa mbere w’igikombe cy’Isi wabaye hashize imyaka 26 FIFA ishinzwe. Cyakiniwe bwa mbere muri Uruguay, kitabirwa n’ibihugu 13, aribyo Mexique, Chili, Argentine, Brésil, Bolivie, Pérou, Uruguay, Paraguay, États-Unis, France, Yougoslavie, Roumanie, Belgique.

Harimo ibihugu by’u Burayi bine gusa, ibindi byari byapinze kubera urugendo rurerure mu bwato. Cyatwawe na Uruguay yacyakiriye.

Igitego cya mbere mu gikombe cy’Isi cyatsinzwe n’umufaransa, Lucien Laurent, tariki ya 13 Nyakanga 1930, u Bufaransa bukina na Mexique.

2.Udushya, ibintu bidasanzwe ku bihugu

Uruguay, nicyo gihugu cya mbere kititabiriye imikino y’igikombe cy’Isi ikurikira mu 1934, kandi ari cyo kigifite nk’uko bisanzwe bigenda. Impamvu cyatanze ni iz’agahimano no kwihimura ku bindi bihugu by’i Burayi bitari byaritabiriye icyo mu 1930.

Afurika y’Epfo, nicyo gihugu cya mbere kandi rukumbi kugeza ubu muri Afurika cyateguye iyi mikino mu 2010. Cyakora ubu Maroc irahatanira kuzakira icya 2026, ihanganye n’itsinda ry’ibihugu 3 byo ku mugabane wa Amerika: USA, Canada na Mexique.

AfUrika y’Epfo kandi ni nacyo gihugu cya mbere cyaviriyemo mu matsinda aricyo cyakiriye iyi mikino.

Naho u Bufaransa, nicyo gihugu cya mbere cyaviriyemo mu matsinda kandi aricyo gifite igikombe. Aho ni mu 2002, muri Koreya n’u Buyapani, ku mukino wo gufungura bwatsinzwe na Senegal kandi bwatahiye mu matsinda nta gatego namba bwinjije. 

Muri uyu mwaka wa 2002 kandi, Koreya y’Epfo yageze ku mukino ubanziriza uwa nyuma (demi-finale), iba igihugu cya mbere muri Aziya kigeze kuri urwo rwego.

3. Hari ibihugu byakigaruriye, n’ibitazi aho gikinirwa

Mu ncuro 20 zose, igikombe cy’Isi kimaze gutwarwa n’ibihugu 8, aribyo: Bresil(5), u Budage (4), u Butaliyani (4), Uruguay (2),  Argentine (2), u Bufaransa(1), Espagne (1), u Bwongereza (1).

Nta na rimwe Bresil, imaze guca agahigo mu kugitwara incuro 5, yigeze ibura mu mikino y’iki gikombe.

4.Ba rutahizamu : Ibitego by’imirabyo

Igitego cyihuse kurusha ibindi mu gikombe cy’Isi kugeza ubu ni icy’umunyaturukiya Hakan Sukur cyatsinzwe ku isegonda rya 11, mu mwaka wa 2002. Uyu ubu akaba ari umudepite mu nteko y’igihugu cye.

Ikindi gitego gikurikirwa n’icya Vaclav Masek  cyo ku isegonda rya 15 mu mwaka wa 1962,  ariko uyu niwe wicaye ku ntebe igihe kinini, kuko yamaze imyaka 40 ntawe uramwigimba.

5.Ba rutahizamu: byinshi mu mikino mike, imyaka mike

Umukinnyi watsinze ibitego byinshi mu mikino y’igikombe cy’Isi ni umudage Miroslav Josef Klose, umaze kugeza ibitego 16 mu bikombe bine yakiniye (2002 / 2006 / 2010 / 2014) mu mikino 24.

Umugwa mu ntege ni Ronaldo Luis Nazário de Lima, ufite ibitego 15 yatsinze mu bikombe bitatu yakinnyemo (1998/ 2002 / 2006 ), mu mikino 19 gusa.

Ariko aba bombi hari ubatambutse, umufaransa Just Fontaine, kuko we yatsinze ibitego 13 mu mikino 6 mu gikombe kimwe, hari mu 1958.

6.Benengango n’igikombe cy’Isi : Bakibye kabiri

Igikombe kimaze kwibwa incuro ebyiri. Ubwa mbere kibiwe i Londres  mu 1966, ariko kiza gutahurwa n’imbwa  yitwaga Rwerimpuga Pickles ahantu mu gihuru cyari mu busitani rwagati.

Ubwa kabiri bwo cyibwe burundu, mu 1983, ubwo cyari kibitswe na Bresil yari imaze kucyegukana gatatu mu 1970. Mu 1983 rero, abajura bahotoye umuzamu w’aho cyabikwaga baragitwara na n’ubu.

7.Amategeko agenda avugururwa

Gutanga amakarita byatangiye mu 1870, naho gutera penaliti bitangira mu 1982.

Mu 1994, nibwo Penaliti zatewe bwa mbere mu mukino usoza (final), hagati ya Bresil n’u Butaliyani, zongera guterwa mu 2006 hagati y’u Butaliyani n’u Bufaransa.

8.Abakambwe mu gikombe cy’Isi

Umukinnyi wagiye mu gikombe cy’Isi ashaje ni umunyakameruni, Roger Milla, kuko mu 1994 yagikiniye afite imyaka 42.

Gusa uwabashije kugitwara akuze cyane ni myugariro w’umutaliyani Dino Zoff wagitwaye afite imyaka 40 mu 1982.

Brezil niyo imaze gutwara ibikombe byinshi

 

Karegeya Jean Baptiste/ Bwiza.com

Tanga igitekerezo

Your email address will not be published.