DGPR

Kwamamaza

Kwamamaza

DFID iremeza ko inkunga y’u Bwongereza ku Rwanda ntaho ihurira n’amasezerano yarwo na Arsenal

0

Ikigo cy’igihugu mu Bwongereza gishinzwe iterambere mpuzamahanga (DFID) cyahakanye amakuru y’itangazamakuru ryo muri iki gihugu rivuga ko u Rwanda rwakoresheje amafaranga y’inkunga ruhabwa mu kugirana na Arsenal amasezerano agamije kurushaho guteza imbere urwego rw’ubukerarugendo rw’igihugu ngo kirusheho gusurwa kinashorwemo imari.

Ni amasezerano y’imyaka 3 u Rwanda na Arsenal byagiranye, aho ku myambaro y’iyi kipe ku kuboko ku imoso hazaba handitse ‘Visit Rwanda’(Sura u Rwanda) ndetse hakaziyongeraho n’ibindi birimo gufasha u Rwanda mu iterambere ry’umupira w’amaguru.

Aya masezerano u Rwanda ruyitezeho kuzungukira kuri miliyoni 35 z’abafana bakurikira Arsenal buri munsi ndetse no ku bagera kuri miliyoni 100 bakurikira imikino ya Arsenal.

Nyuma y’aho aya masezerano ashyiriweho umukono, yavuzweho byinshi  birimo ko agiye kurushaho kuzamura urwego rw’ubukerarugendo mu Rwanda, mu gihe ku rundi ruhande ibinyamakuru byo mu Bwongereza byavugaga ko amafaranga u Rwanda ruzajya rwishyura Arsenal ari imisoro y’abaturage babwo iba yahawe u Rwanda nk’inkunga ngo ifashe mu bikorwa byo gukura abaturage mu bukene.

Itangazo rya DFID ryashyizwe ahagaragara kuri uyu wa Mbere ushize, rivuga ko ibi bivugwa atari byo.

“DFID nta mafaranga iha Visit Rwanda cyangwa RDB”

DFID ikaba yasubizaga inkuru ya The Sun, nayo yanenzwe, yavugaga ko u Rwanda rutunzwe n’inkunga y’amahanga igera hafi kuri kimwe cya kabiri cy’ingengo y’imari y’igihugu.

DFID iti: “Ibi ntabwo ari byo. Inkunga y’imari y’amahanga kuri ubu iri kuri 16% y’ingengo y’imari y’u Rwanda. Ibi byavuye kuri hafi 60% mu myaka 10 ishize mu gihe u Rwanda rwazamuraga ubukungu bwarwo, rukagabanya ubukene bukabije rukiringira gacye inkunga.”

Iki kigo cyakomeje kivuga ko inkunga u Bwongereza buha u Rwanda ziba zigenewe gahunda zisobanutse nk’uburezi n’ubuhinzi. Kikavuga ko gikurikirana ibyagezweho muri izi gahunda ngo bihindure ubuzima bw’abaturage bakennye, ari nako gishishikariza u Rwanda narwo kugira uruhare mu kwishakira ibisubizo.

“Inkunga y’u Bwongereza ku Rwanda yagiye igabanuka imyaka myinshi, kuko twafashaga u Rwanda guhagarara ku maguru yarwo abiri, rukagaburira abaturage barwo kandi rugashora imari mu bukungu bwarwo n’aho rukura.”

Ikigo nterankunga cy’Abongereza gitanga ikigaragaza iterambere u Rwanda rwagezeho kinyomoza inkuru zivuga ko iterambere ry’u Rwanda ricumbagira.

Ikinyamakuru The Sun cyari giherutse gutangaza ko hari bicye bigaragaza iterambere ry’u Rwanda mu gihe rwakuye abaturage miliyoni 2 mu bukene bukabije kuva mu 2005 ndetse ubukungu bwarwo bukaba buzamuka ku rugero rw’8% buri mwaka kuva mu 2000.

DFID kandi ivuga ko mu Rwanda icyizere cy’ubuzima cyazamutse cyane kurusha ahandi hose ku Isi, amafaranga u Rwanda ruzakoresha mu masezerano ya Visit Rwanda akaba ari ayavuye mu rwego rw’ubukerarugendo rurushaho kuzamuka aho rwinjiza miliyoni 400$ buri mwaka akaba ari narwo rwinjiriza amadovize menshi igihugu imbere y’icyayi, ikawa n’amabuye y’agaciro.

Uru rwego rukaba ruteganya gukuba kabiri amafaranga y’amahanga rwinjiza buri mwaka akazagera kuri miliyoni 800$ mu 2024 kandi ngo amasezerano ya Visit Rwanda azabigiramo uruhare.

Mu kiganiro yahaye The New Times dukesha iyi nkuru kuri uyu wa Mbere, umuyobozi mukuru wa RDB, Clare Akamanzi, akaba yatangaje ko igihugu cy’u Bwongereza ari cyo cya kabiri giturukamo abasura u Rwanda benshi nyuma ya Leta Zunze Ubumwe za Amerika.

 

Dennis Nse./Bwiza.com

Tanga igitekerezo cyawe

Your email address will not be published.